Flotadores para salvar a sanidade pública dos recortes do PP

A Comisión de Centro de Especializada do CHUAC mobilizouse para esixir un incremento de persoal e contra o peche de camas no verán
A Coruña - 01 Xun 2016
Persoal sanitario realizou este mércores unha concentración no Hospital da Coruña contra os recortes aplicados pola Xunta do PP, que, unha vez máis, repite peche de camas durante o período estival. Na área da Coruña esta medida suporá contar con arredor de 200 camas menos “o que abocará o servizo de urxencias ao colapso e os/as doentes a estar amoreados/as nos corredores días e días pola falta de camas para ingresar”.

A Comisión de Centro de Especializada do CHUAC, que convocaba a protesta, alertou da masificación, o incremento das listas de espera, o colapso dos servizos de urxencias, os peches de camas hospitalarias, a perda de postos de traballo ou contratación precaria de profesionais por días e incluso por horas, provocadas tras anos de recortes na sanidade pública.

Contra este deterioro deliberado, o órgano de representación chamou “a rescatar a sanidade pública, a salvala duns dirixentes políticos que non son quen de asumir as súas obrigas cos usuarios/as e cos/as profesionais”. Para visibilizar este rescate, as traballadoras e traballadores acudiron á protesta levando flotadores salvadores.

Co esta acción tamén se quere simbolizar o papel xogado polo persoal sanitario pois “diante do intento do PP de afogar a sanidade pública, as e os profesionais fomos e somos o seu ‘salvavidas’, xa que a calidade e capacidade asistencial só se mantén grazas ao noso esforzo continuado”.

Situación de emerxencia en moitas unidades

A presidenta da Comisión de Centro e Secretaria Comarcal da CIG-Saúde, María Seijo, responsabilizou a Xerencia do abandono que padece o complexo hospitalario “e de conducires a moitas das  unidades e servizos a unha situación de emerxencia debido a uns cadros de persoal tan escasos que fan imposíbel satisfacer as demandas e necesidades dos/as doentes”.

Nesta situación alarmante, sinalou, atópanse servizos e unidades como Neurocirurxía, Neuroloxía, Neumoloxía, Infecciosos ou Urxencias, os servizos de Farmacia, Laboratorios, Radioloxía ou Cociña, ou o Hospital de Oza.

Pola súa banda, censurou Seijo, a Xerencia rexeita calquera incremento de persoal, “ignorando os centos de peticións realizadas polos/as profesionais e o risco que para a saúde e seguridade dos doentes e do persoal supón manter a asistencia sanitaria nestas condicións de precariedade”.

Fronte a isto a Comisión de Centro do CHUAC criticou os anuncios de carácter propagandístico e con finalidade electoral aparecidos nas últimas semanas e esixiu que se  incremente o persoal nas unidades deficitarias e se manteñan abertas todas as camas hospitalarias.