Eólica Así Non! convoca unha mobilización descentralizada en demanda dun novo modelo para Galiza

A Coordinadora Eólica Así Non! ten convocada para o domingo 9 de febreiro unha  mobilización descentralizada para denunciar o modelo de espolio enerxético que promove a Xunta de Galiza. As protestas estaban previstas inicialmente para o 26 de xaneiro, co gallo do Día Mundial da Enerxía Limpa, mais tiveron que ser aprazadas a casa da alerta por temporal.

Eólica Así Non! afirma que o modelo promovido pola Xunta non ten en conta os intereses da poboación, senón que ten como principal obxectivo beneficiar o capital e tampouco ofrece garantías de preservación medioambiental, tal e como están a demostrar todas as paralizacións cautelares que resolve o Tribunal Superior de Xustiza de Galiza.

A Coordinadora denuncia ademais as últimas reformas legais da Xunta de Galiza, que teñen como obxectivo dificultar que a poboación se poida defender diante destes proxectos agresivos e depredadores do territorio, destinando recursos públicos para exercer “violencia institucional” contra as comunidades de veciñas e veciños afectados. Comunidades que sofren un continuo acoso administrativo a través da sobresaturación de proxectos, da desregulamentación e da xeración de inseguridade xurídica, difamando e criminalizando a protesta social.

Eólica Así Non! aposta por unha nova planificación eólica real, que ordene a explotación desta enerxía no territorio, con obxectivos sociais e ambientais, facendo partícipe ao pobo galego e non en función dos intereses das grandes multinacionais enerxéticas.

• enerxía eólica
• enerxías renovábeis
• eólica así non