“Enterro” simbólico do servizo de Urxencias ás portas do Hospital Clínico
O persoal do servizo de Urxencias do hospital Clínico de Santiago iniciaba ás 8:00 horas da mañá de hoxe un peche de 24 horas para demandar medios humanos suficientes para poder atender a demanda asistencial que teñen. Nun intento de frear a protesta, a Xerencia convocaba para primeira hora de hoxe mesmo, ao comité de folga para presentarlle unha nova proposta. O comité agardará a que sexa a asemblea de traballadores/as quen decida. Entrementres a folga continúa e o peche, tamén.
Cun cadaleito, unha coroa de flores, carpideiras e ataviado de negro o persoal de Urxencias simbolizaba o enterro da sanidade pública, en xeral, e do servizo de Urxencias, en particular, na entrada principal do hospital. Iniciábase así unha nova xornada de folga tras cinco semanas de mobilizacións agardando por unha solución ao conflito.
Camilo Agulleiro, presidente da Comisión Especializada de Centro, explicaba que antes mesmo de comezar o peche de 24 horas previsto para esta xornada, recibiron a chamada da Xerencia convocándoos a unha xuntanza na que se lles presentaba unha nova proposta que “supón un pequeno avance”.
Con todo, Agulleiro sinala que “estamos moi distantes nas posturas porque na práctica o que nos ofrece é un aumento máis de enfermeiros/as e un aumento de auxiliares”. Por iso, o que acordou o comité de folga foi convocar unha asemblea extraordinaria para este venres na que se informará ao persoal do seu contido para que sexan as propias traballadoras e traballadores quen decidan se se acepta ou non.
Manifestación o 9 de xaneiro
Mantense así a folga e a convocatoria dunha manifestación para o vindeiro día 9 de xaneiro, con saída da Praza Roxa porque, de momento, “o único positivo é que a Xerencia quere negociar, aínda que haxa diferenzas”. Porén, para Agulleiro “é evidente que o seu obxectivo era desmontar hoxe o peche”.
Ás seis da tarde estaba previsto dar por rematado o velorio e trasladar o cadaleito á entrada de Urxencias para continuar co peche até mañá tal e como estaba previsto.
