![Confederación Intersinidical Galega](/assets/cig/2022/logos/cig.png)
Denuncian o peche da carpintaría do Hospital Provincial de Pontevedra aproveitando a ausencia de dous traballadores
A CIG-Saúde sospeita que se trata dun paso máis na privatización do servizo de mantemento
![](assets/images/d/2016%2002%2018%20PecheCarpintariaEOXIPontevedra.grande-09e1b35d.jpg)
A CIG-Saúde vén de amosar o seu rexeitamento á decisión da EOXI de Pontevedra e Salnés de pechar a carpintaría do Hospital Provincial aproveitando a ausencia de dous traballadores, un de baixa laboral e outro en comisión de servizo en Santiago. Na central sospeitan que se trata dun paso máis cara a privatización total do servizo de mantemento.
Dende a federación de Saúde da Confederación Intersindical Galega aseguran non entender por que non se cobren estas baixas mediante a listaxe de contratación, “na que existen moitos profesionais esperando traballar”.
Sosteñen que os traballos estanse a acumular “e moito nos tememos que sexa para derivalos a unha empresa privada”. Na central sospeitan que se está a aproveitar esta situación para dar un paso máis e privatizar na súa totalidade o mantemento no Hospital Provincial.