![Confederación Intersinidical Galega](/assets/cig/2022/logos/cig.png)
Delegados/as da CIG-Industria reclaman cunha protesta a readmisión dun traballador da empresa Cumegal de Ourense
O despido produciuse despois de que se presentase ás eleccións sindicais na candidatura da central
![](assets/images/9/2016%2003%2003%20ProtestaDespidoCumegalOurense01.grande-e591f799.jpg)
Arredor de 30 delegados/as da federación de Industria CIG concentráronse no día de onte ás portas da empresa Cumegal e do Concello de San Amaro, en Ourense, para reclamar a readmisión dun traballador que foi despedido tras presentarse ás eleccións sindicais na candidatura da central.
A mobilización desenvolveuse durante dúas horas diante das instalacións da empresa, onde os concentrados berraron consignas reclamando a readmisión do compañeiro. A continuación trasladaron a protesta até as portas da casa do Concello de San Amaro.
Dende a federación de Industria da CIG-Ourense explican que o xuízo polo despedimento terá lugar o vindeiro martes 8 de marzo e agardan que a decisión da empresa de rescindirlle o contrato ao traballador sexa declarada nula.