Delegadas da CIG nas tendas de Inditex inician un peche na sede central en demanda dunha negociación provincial
As delegadas da CIG nas tendas da provincia da Coruña acaban de iniciar un encerro (por volta das 11:30h) na sede de Inditex en Sabón para reclamarlle á multinacional que cumpra o seu compromiso e reabra a negociación provincial para abordar as melloras laborais e sociais que ficaron pendentes. O obxectivo das compañeiras é permanecer nas instalacións até que a empresa acceda a negociar e concrete unha data para retomar as reunións da mesa.
As delegadas da CIG (que representan a máis do 70% das dependentas na provincia) queren facer valer con esta acción reivindicativa o compromiso trasladado por Inditex o pasado mes de decembro e defender o seu dereito a poder negociar aquí as súas condicións de traballo, ao igual que fan os compañeiros e compañeiras doutras empresas do grupo.
A este respecto, critican a política de Inditex de afastar e centralizar as relacións laborais en Madrid e a insistencia nunha negociación estatal na que non se concede nada para provincias como a da Coruña.
Demandas que só afectan ao persoal da provincia
As delegadas da CIG subliñan que único que lle demandan a Inditex é negociar os puntos que só afectan á provincia, como o plus sede, o plus de antigüidade que aparecía anteriormente no convenio e que conservan outros compañeiros da empresa, o bono de comida, e a homoxeneización e equiparación de todas as condicións reguladas nos comités coa empresa de cada cadea.
A este respecto consideran "inxusto e discriminatorio" que dentro da mesma provincia as traballadoras teñan condicións diferentes en materia de calendarios, librada de sábados, licencias, descansos, xornadas, categorías, ou complementos.
Á espera da resposta da multinacional á acción iniciada este venres, as traballadoras seguen mobilizándose na defensa dos seus dereitos e xa teñen convocada folga para o 27 de xuño, coincidido co inicio do período de rebaixas.
