Concentracións nas sete comarcas para exixir condicións laborais e salariais dignas no comercio
A CIG ten convocadas dúas xornadas de folga no sector para o 26 de xullo e 15 de agosto
A CIG-Servizos iniciou este venres a campaña informativa e de mobilizacións para esixir condicións laborais e salariais dignas no comercio. A central realizou concentracións en grandes superficies das sete comarcas (A Coruña, Compostela, Ferrol, Lugo, Ourense, Vilagarcía e Vigo), repetirá protestas o día 7 de agosto e ten convocadas dúas xornadas de folga para o 26 de xullo e 15 de agosto, datas de apertura autorizadas no comercio galego.
"Grandes almacéns, grandes explotadores", "empregos precarios, beneficios millonarios" ou "domingos e festivos para os directivos", foron algunhas das consignadas que se corearon durante as concentracións para denunciar a precarización constante das condicións de traballo no comercio e uns salarios “de subsistencia” que apenas superan o SMI en moitos dos convenios do sector.
Contratos parciais e dificultades para conciliar
A CIG-Servizos denuncia que este sector, altamente feminizado e cun índice moi elevado de contratos a tempo parcial, sigue sendo un dos que peor permite conciliar vida familiar e laboral, xa que moitas empresas traballan a quenda partida e os festivos e domingos que a Xunta permite abrir “fanse de xeito obrigatorio e sen ningún tipo de compensación a cambio, mesmo incumprindo o descanso diario e semanal regulado por lei”.
Neste ano 2026, dous deses días autorizados son o domingo 26 de xullo e o sábado 15 de agosto, xornadas nas que as CIG ten convocada folga de 24 horas. Estes paros dán continuidade ao realizado o pasado 2 de abril , que tamén foi festivo de apertura.
Ás dificultades para conciliar e descansar, súmase os cadros de persoal reducidos e a aplicación de sistemas de traballo e organizativos que empeoran as condicións, provocan cargas de traballo excesivas e unha falta total de cobertura de baixas, vacacións e licencias. Isto tradúcese en ritmos de traballo máis elevados e na deterioración da saúde das persoas traballadoras. Non por casualidade as baixas por doenzas músculo-esqueléticas, estrés ou ansiedade teñen aumento considerabelmente.
Por si todo isto fose pouco, a patronal estatal está a atacar agora “brutalmente” a negociación colectiva en Galiza coa “necesaria complicidade” dos sindicatos estatais, “abrindo mesas negociadoras en Madrid que só serven para recortar dereitos conquistados tras anos de mobilizacións e folgas”.
Por iso, con esta campaña de mobilizacións, a CIG-Servizos reivindica:
Incremento dos cadros de persoal, convertendo xornadas parciais en completas e garantindo a contratación do persoal necesario para evitar a sobrecarga laboral.
Descanso e conciliación, con quendas e horarios estables que non sufran modificacións diarias ou semanais, que faciliten a conciliación da vida persoal, familiar e laboral e que respecten o descanso diario e semanal e a voluntariedade de traballar en domingos ou festivos.
Salarios xustos, implementando nos vindeiros convenios pluses que recoñezan o valor do traballo e retribúan aspectos como responsabilidade, polivalencia ou dispoñibilidade.
Acordo marco galego conformando unha mesa de negociación que traballe na consecución dun Acordo Marco Galego de Comercio que recolla as necesidades específicas de todo o comercio galego e que protexa a negociación provincial fronte a estatal.