
CIG-Saúde denuncia un “novo engano do Ministerio” ao propor unha reclasificación profesional sen incremento salarial

A CIG-Saúde denuncia que o Ministerio de Sanidade propón na negociación do Estatuto Marco unha clasificación profesional por nivel académico, pero cando realiza a equivalencia cos grupos de clasificación da función pública, non recoñece as retribucións básicas, senón que o deixa aberto a futuras negociacións dos orzamentos do Estado, sen concretar.
Isto significa, critica o secretario da CIG-Saúde, Manuel G. Moreira, o recoñecemento “nun papel de A1, B, C1, C2 e E pero sen incremento salarial para as categorías profesionais que cambian de grupo de clasificación”.
CIG-Saúde defende unha clasificación profesional propia, que recoñeza os requisitos de titulación, a formación sanitaria específica e a prestación do traballo que se realiza, coa equivalencia que corresponda cos grupos de clasificación da función pública tamén a nivel retributivo, ademais das subas salariais “que é preciso realizar para adecuar as retribucións coa formación requirida para cada categoría profesional, a responsabilidade e a complexidade das funcións realizadas”.
Así mesmo, a central sindical tamén solicita que se estabeleza un réxime extraordinario de adaptación desde a situación actual aos novos requirimentos, e que o novo Estatuto Marco deixe aberta a posibilidade de que unha categoría poida ter unha nova reclasificación, de xeito automático, “se se modifica o nivel académico para a titulación que é requisito de acceso para a mesma”.
Por todo isto, CIG-Saúde traslada o apoio ás concentracións convocadas polas asociacións de técnicos/as sanitarios e, de continuar o Ministerio sen recoñecer o incremento retributivo asociado ao cambio de grupo de clasificación, non descarta ningunha medida de presión.