Trasladan unha proposta de reparación ao persoal traballador do Concello da Coruña represaliado polo franquismo
A sección sindical da CIG no Concello da Coruña vén de achegar aos grupos políticos municipais unha proposta de homenaxe e reparación das traballadoras e traballadores do Concello da Coruña vítimas do franquismo. Esta proposta foi aprobada polo pleno da Xunta de Persoal o pasado 26 de setembro de 2023 e posteriormente presentada no rexistro xeral do Concello sen obter resposta até a data.
Neste contexto, a sección sindical da CIG decidiu "darlle impulso de novo a esta proposta enviándolla a todos os grupos políticos municipais co fin de que sexa debatida e aprobada polo pleno".
A proposta de actuación consistiría no seguinte:
- Realizar un censo de persoas traballadoras deste concello que foran represaliadas polo franquismo
- Recepción institucional ás familias das persoas traballadoras municipais vítimas do franquismo no salón de plenos do Concello da Coruña
- Anulación e restitución de todos os expedientes disciplinarios ditados durante a ditadura franquista contra traballadores e traballadoras municipais.
- Colocación dunha placa no Palacio Municipal de María Pita que lembre e honre a todos os cargos públicos e persoas traballadoras municipais que foron asasinadas ou represaliadas despois da sublevación militar de 1936 (entre outras persoas: alcalde Alfredo Suárez Ferrín, secretario Joaquín Martín Martínez, xefe de negociado Francisco Prego Campos.... e decenas de persoal funcionario municipal).
- Retirada de todas as distincións honoríficas realizadas polo pleno deste Concello ao longo da historia que contribuíron á represión dos/as traballadores/as municipais, así como de todos os escudos, placas, monumentos e grupos de vivendas na honra de alcaldes que foron artífices de accións represoras contra o persoal traballador deste concello durante o franquismo.
A sección sindical da CIG agarda "contar co apoio da totalidade dos grupos políticos municipais para que este acto de reparación e de xustiza saia adiante, como xa teñen feito outra moitas corporacións municipais".
