![Confederación Intersinidical Galega](/assets/cig/2022/logos/cig.png)
CIG-Correos solicita na Inspección de Traballo o peche do CTA Lavacolla por risco biolóxico
![](assets/images/0/2023-10-18%20CTA%20Lavacolla%20Correos.001-4588c580.jpg)
CIG-Correos vén de presentar unha nova denuncia perante a Inspección de Traballo reclamando o peche, por risco biolóxico, do CTA de Lavacolla, en tanto non se proceda á limpeza e desinfección do centro de traballo. Denuncia que o persoal desenvolve a súa actividade en presenza de ratas, cascudas, insectos e outros microorganismos, tal e como consta no informe elaborado polo propio servizo de prevención de Correos.
![](imaxes/adaptadas/780/files/novas/2023/10/18/Correos%20folga%20servizo%20limpeza/2023-10-18%20CTA%20Lavacolla%20Correos.005.jpg)
O CTA de Correos (Centro de Tratamento Automatizado) realiza a clasificación da correspondencia e paquetería para toda Galiza. No centro de Lavacolla traballan unhas 150 persoas repartidas en tres quendas, sete días á semana. Este persoal, segundo denuncia a CIG-Correos, está traballando en condicións insalubres. Xa hai aproximadamente 15 días, o servizo de prevención de Correos confirmaba que había un risco moderado e advertía da posibilidade de que a curto prazo se elevara a risco grave. “Ao noso entender isto é xusto o que está pasando agora”, explica Manuel Anxo Álvarez Amado.
Por iso, na denuncia presentada, debido ao deterioro froito da falta de limpeza das instalacións “hoxe a xeración de microorganismos e ratas, cascudas e outros insectos, está descontrolada”, explican.
Na denuncia advírtese ademais que a situación “é límite”. “Non temos máis que imaxinarnos a situación de 150 persoas utilizando diariamente os 40 urinarios que hai, que levan sen limpar desde hai máis de mes e medio”, sinala Álvarez Amado.
![](imaxes/adaptadas/780/files/novas/2023/10/18/Correos%20folga%20servizo%20limpeza/2023-10-18%20CTA%20Lavacolla%20Correos.006.jpg)
Por iso, a CIG-Correos reclama o peche da instalación mentres non se resolva o grave problema de falta de hixiene que hai neste momento. Advirte ademais de que “se nos vindeiros días non se dá solución a este problema presentaremos máis denuncias diante doutros organismos e non descartamos tentar paralizar o centro de traballo”.
A semana pasada xa houbo mobilizacións do persoal de Correos da oficina do Franco e da unidade de reparto de Costa Vella, tamén para denunciar as condicións insalubres nas que está traballando o persoal destas oficinas.
A este respecto, Álvarez Amado considera que “a imaxe que Correos está dando ao público, que tamén se ve afectado pola ausencia de condicións hixiénicas das oficinas, é denigrante. Non é normal que a xente que vén enviar un paquete teña que andar saltando montes de porcallada”.