CIG-Banca non asina o convenio de Aforro porque nin garante o poder adquisitivo, nin avanza en dereitos

A CIG-Banca denuncia que o novo convenio de Aforro “nin garante o poder adquisitivo, nin avanza en dereitos”, consolidando os recortes de anos anteriores, malia o sector ter acumulado “beneficios millonarios” nos últimos anos. Por iso non asinou o texto definitivo, presentado o pasado día 18 de abril, na xuntanza da mesa negociadora.

A CIG-Banca asegura que cos incrementos salariais contemplados no texto do novo convenio non se recupera o poder adquisitivo perdido. “A maior fonte de recorte salarial foron os Convenios Colectivos de Aforro, segundo os datos que os sindicatos asinantes expuxeron ao inicio da negociación” e o novo convenio “consolida a perda en táboas”.

Subas insuficientes para 2024-2026

Establécese unha suba do 5% para 2024 (o IPC galego xa está no 3,5%), 3% para 2025 e 3% para 2026. A este respecto, a CIG-Banca sinala que “malia as perdas dos convenios anteriores, por non ter cláusula de revisión anual vinculada ao IPC, seguen sen incluíla. Establecen unha ao final do texto do convenio e topada”.

Sinala que dan un pago único de 1.000 euros a cambio de eliminar as pagas ROE. Xunto a isto, “non se actualiza a quilometraxe, nin as axudas de gardería, nin as de formación fillos/as, nin as de formación empregados/as. E manteñen o recorte no cálculo dos trienios”.

Múltiples horarios

Para evitar a guerra de horarios, que prexudica ao persoal, a CIG defendía un horario xeral que fose de aplicación en todo o sector, xa que cada empresa ten múltiples horarios. Porén, “non haberá un horario único sectorial, nin se reduce a xornada en pleno debate político ao respecto”.

Non se pon freo á presión comercial

Todos os bancos alegan, segundo a federación de banca, a dura competencia para xustificar a presión comercial desmedida. Por iso entende que o lóxico sería que as medidas para poñer coto á presión deberían ser abordadas a nivel sectorial. Pero tampouco sobre esta cuestión se recolle unha soa medida”.

Por iso a CIG-Banca denuncia que “malia os beneficios históricos, consolidan recortes anteriores, recortan quilometraxe ou axudas de estudos, non hai un horario único, nin medidas contra a presión comercial”.

Abanca

Fronte a isto, a CIG-Banca apunta que, no caso concreto de Abanca, logo da folga convocada pola CIG e ASCA o 11 de xaneiro, o banco subiu os salarios un 8%, abrindo un proceso de negociación coa representación sindical, na que o sindicato nacionalista reivindica subas adicionais para o 2025 e 2026, uns novos horarios (actualmente os máis amplos do sector) e o fin da presión comercial. Ao longo deste mes de abril e do mes de maio están convocadas asembleas de traballadores/as por toda Galiza para analizar a negociación con Abanca e posibles medidas de presión.

• convenio Aforro
• negociación colectivo