Centos de persoas reclámanlle a Xunta medidas para reducir as listas de agarda na sanidade pública
Centos de persoas participaron este xoves nas trece mobilizacións convocadas pola Plataforma SOS Sanidade Pública baixo o lema “Listas de agarda: máis transparencia, máis recursos públicos”. Unhas protestas descentralizadas a través das que se quere denunciar o deterioro do sistema sanitario público galego, especialmente na atención primaria, e exixir á Xunta de Galiza un cambio radical nas súas políticas ante o risco de colapso irreversíbel da sanidade se non se actúa con urxencia.
A atención primaria, que debería ser próxima, accesíbel e resolutiva, está colapsada por listas de espera inaceptábeis, falta de persoal e recursos, e unha mala organización. Antes de 2008, as listas de espera na atención primaria eran practicamente inexistentes, pero hoxe a espera media en Galiza supera os 7 días, con centros de saúde que chegan a 15 días ou mesmo un mes.
No caso da atención hospitalaria, as listas de agarda para primeira consulta rexistran unha espera media de 60 días e para as cirurxías é de 76 días. Diante disto, SOS Sanidade exixiu uns tempos de espera razoábeis e adaptados ás necesidades das persoas pacientes. Porque as listas de agarda téñense convertido nun serio problema que provoca sufrimento e ansiedade entre a poboación e que aumenta as consultas tanto en atención primaria como en urxencias.
A Plataforma demanda en primeiro lugar unha xestión transparente das listas, “porque se non hai transparencia é moi difícil saber que medidas é necesario aplicar”; recursos públicos para a súa xestión, polo que consideran necesario a elaboración dun plan para dar resposta ás necesidades reais en base aos datos completos; e a paralización das derivacións á sanidade privada e que eses cartos se invistan no sistema público.
Xunto a isto, exixe a creación de unidades especializadas, como coidados paliativos pediátricos, e mellora da atención no rural e a fin das penalizacións aos e ás profesionais e medidas contra as agresións ao persoal da sanidade.
