Campaña de recollida de sinaturas reclamando o indulto para Pintos

Vén de se iniciar a campaña de recollida de sinaturas en apoio á solicitude de indulto para Xesús Anxo López Pintos. Campaña que forma parte dun conxunto de actuacións que se irán desenvolvendo, entre as que xa se anuncia a convocatoria dunha manifestación que percorrerá as rúas de Ferrol o vindeiro día 31 de maio. Os pregos de sinaturas pódense recoller, e unha vez cubertos entregar, nos locais da CIG.

En outubro de 2012, nun contexto sociolaboral de absoluta deterioración en Ferrolterra: peche de empresas, perda de postos de traballo e deterioro xeral das condicións laborais, a cidadanía acudía a unha convocatoria dos comités de empresa de Poligal e Navantia diante do hotel Almirante, onde o PP, daquela no goberno, celebraba un acto de campaña. 

Tras horas de protesta, a mobilización foi disolta por unha carga policial absolutamente desproporcionada e inxustificable cun único obxectivo: perseguir e criminalizar a mobilización como ferramenta da clase traballadora para mellorar as súas condicións laborais e de vida.

Para amedrentar a loita obreira, e como mensaxe exemplarizante, non dubidaron en dirixir as agresións ao compañeiro Pintos, como símbolo da entrega militante na loita polos dereitos e as liberdades da clase obreira, que foi tamén agredido e vexado mentres permanecía detido e incomunicado na comisaría, e agora rematado cunha sentenza xudicial que converte a vítima en verdugo. Todo isto coa aplicación máis humillante da chamada Lei mordaza, unha lei que a día de hoxe segue vixente.

Demandar xustiza para Pintos, evitar a súa entrada no cárcere e que se consume este ataque á liberdade sindical, pasa porque toda a sociedade e as súas organizacións, con unidade e compañeirismo, academos a amnistía do compañeiro.