Cae a afiliación á Seguridade Social en máis de mil persoas no mes de novembro

Malia ter descendido o número de persoas inscritas como desempregadas nas oficinas do SEPE en Galiza nun 0,67% con respecto a outubro, 962 persoas paradas menos, a afiliación á Seguridade Social descendeu nun total de 1.092. Unha baixada que se dá en todas as provincias agás na Coruña que, segundo apunta o secretario confederal de Emprego da CIG, Francisco González Sío, “non implica que haxa máis emprego” á vista dos datos de afiliación.  Máis porque esa caída da afiliación se dá, sobre todo, entre as mulleres cando é precisamente entre elas entre as que máis cae o desemprego: 900 persoas.

Fonte: Seguridade Social

O importante descenso da afiliación na provincia de Lugo, e, en moita menor medida en Pontevedra, leva a esa importante caída da afiliación neste último mes. Datos que son pouco significativos en Ourense e A Coruña. “É moi preocupante que xusto na Provincia de Lugo, que ten unha poboación asalariada pequena sufra un descenso tanto grande na afiliación á Seguridade Social, de nin máis nin menos 1.082 persoas que abandonan o mercado laboral”, subliña Sío.

Ademais, o secretario confederal de Emprego chama a atención sobre a falta de concordancia coa evolución do desemprego, xa que este tamén descende, o que implica que se traduciu nunha saída do mercado de traballo. Tan só na provincia de Ourense, descende o desemprego e medra a afiliación.

A provincia da Coruña, onde aumentou a afiliación á Seguridade Social, foi a única na que aumento do desemprego, o que Francisco González Sío considera que se debe a unha menor afluencia, dada a época do ano na que estamos, de turistas no Camiño de Santiago.

Fonte: SEPE

A pesar de que en termos absolutos onde máis diminuíu o desemprego foi en Pontevedra, en termos relativos é a provincia de Ourense onde se rexistra a maior caída.

Por sexo, a maior caída do desemprego rexistrase entre as mulleres, cun 1,08% menos de desempregadas que en outubro. Entre os homes apenas hai variación. Tamén neste caso a afiliación á Seguridade Social evoluciona en sentido oposto, baixa entre as mulleres e medra entre os homes.

Fonte: SEPE

A meirande parte do descenso do desemprego prodúcese no sector Servizos, e en menor medida en Industria.

Fonte: SEPE

Por grupos de idade, tan só aumentou o desemprego entre os menores de 25 anos.

Fonte: SEPE

Vistos os datos, e tendo en conta que no que atinxe á contratación, continúa a tendencia dos meses anteriores, o secretario confederal de Emprego conclúe que nestes cadros  plásmanse os “tics” do mercado laboral. “Ao estar tan baseado no sector Servizos, o que sucede é que os grupos máis precarios: mulleres e xente moza, aínda nunha situación que parece de relativa bonanza vense castigados por igual pola febleza do mercado laboral”.

• afiliacións á Seguridade Social
• asepeyo
• datos paro
• desemprego
• paro rexistrado