As traballadoras do Servizo de Axuda no Fogar de Boiro conseguen unha paga extra que se chamará “8 de Marzo”
As traballadoras do SAF de Boiro viñan percibindo salarios sen actualizar desde o ano 2011; non se lle computaba o tempo de desprazamentos entre domicilios, tal e como establece o convenio colectivo, e ademais viñan realizando exceso de xornada que nin se lle computaba nin se lle abonaba.
Diante das súas precarias condicións laborais e salariais, estaban dispostas a ir a un conflito colectivo. Previo a isto solicitaron unha mediación na que, por vez primeira, conseguiron que se lle recoñecera o dereito a percibir unha paga extra, por enriba do convenio de Axuda a Domicilio que, ademais, levará o nome de “Paga 8 de Marzo” e será aboada todos os anos nese mes a partir deste.
Tras deste acordo non só percibirán esa paga extra adicional, senón que ademais actualizáronselles xa o salarios, subiránselles cada ano en función do IPC real e váiselles computar o tempo de desprazamento entre domicilios, o cal supón incrementar as xornadas que, maioritariamente, son a tempo parcial.
A CIG-Servizos de Compostela valora moi positivamente este acordo pola repercusión que poida ter no resto dos SAF, xa que é a primeira vez que se consegue unha paga extra por encima de convenio nun sector tan feminizado como este e cunha grande precariedade laboral.
Os SAF son servizos de competencia autonómica que a Xunta deixa de facer e delega nos concellos que o que fan é licitar a prezo hora por debaixo de convenio, o que repercute directamente nas precarias condicións laborais e salariais das traballadoras.
