Arturo Domínguez, reelixido secretario local pola IX Asemblea da CIG do Porriño
A IX Asemblea da Unión Local da CIG Porriño que tivo lugar o pasado venres día 17 na Casa da Cultura da localidade e reelixiu a Arturo Domínguez Míguez como secretario e renovou a Executiva que dirixirá o sindicato nos vindeiros catro anos.
A lista de consenso que encabezaba Arturo Domínguez saíu adiante por unanimidade ao recibir o apoio das 32 persoas que participaron no proceso, os mesmos votos que colleitou a súa candidatura á Secretaría Local.
Durante a Asemblea, na que estiveron presentes arredor de 40 persoas, entre elas o secretaria comarcal da CIG de Vigo, Alberto Gonçalves, aprobouse o Relatorio tamén por unanimidade. No documento faise fincapé no feito que nos últimos catro anos a central foi quen de manter o nivel de afiliación e de representación que a volven situar como primeira forza sindical da localidade.
Tamén se puxo en valor as mobilizacións que está a desenvolver o persoal dos Servizos de Axuda no Fogar (SAF) en demanda dunhas condicións de traballo dignas e para reclamar un protocolo con medidas que garantan a protección e a saúde das persoas traballadoras. “Unha loita que se fixo sen cabe aínda máis necesaria tras o asasinato no seu posto de traballo da compañeira Teresa, empregada do SAF do Concello do Porriño”.
Integrantes da Executiva da CIG do Porriño
- Arturo Domínguez Míguez.
- Mercedes Domínguez Santomé.
- Marco Sousa Ramírez.
- Verónica Pérez Rodríguez.
- Cristian Caamaño Fernández.
- Iria Martínez Vila.
- Salustiano Guerra García.
