Arredor de 1800 escolares desafían a choiva en Vigo nunha nova etapa do Correlingua
A pesares da insistente choiva que caeu sobre a cidade ao longo da mañá, arredor de 1800 escolares de distintos centros educativos da comarca (e tamén das Neves, Tui e incluso un do Grove) tomaron parte na decimostexta edición do Correlingua, a popular carreira polo idioma que nesta ocasión percorrerá unha ducia de localidades do país entre o 2 e o 16 de maio baixo o lema 'O galego está en nós'.
A marcha partiu do Concello -tras o saúdo do alcalde e da edil de Normalización Lingüística- arredor das once da mañá e rematou no pavillón de deportes municipal das Travesas unha hora despois, onde xa agardaban os alumnos/as dos centros de Infantil para celebrar unha festa final que adoita ter lugar no parque de Castrelos. O acto estivo amenizado polo Mago Marco, Talía Teatro e a banda de rock Zënzar.
Ao remate do acto os centros recibiron varios agasallos da organización por ter participado e tamén se entregaron os premios aos gañadores dos concursos, que nesta ocasión foron o IES Josefa Alonso de Matamá e o IES Canicouva de Castrelos. Tamén se deu lectura ao manifesto desta edición.
A seguinte parada do Correlingua será este luns en Monforte de Lemos.
