A Xunta demándalle a XEAL un plan de viabilidade e a empresa responde cun recurso contencioso administrativo

O comité insiste na necesidade de actuar de inmediato sobre as concesións á vista dos reiterados incumprimentos

Cee -

O comité de XEAL mantivo esta mañá unha reunión coa Consellería de Industria na que se confirmou que a empresa está ignorando os requirimentos da Xunta de Galiza a respecto do cumprimento das cláusulas das concesións, concretamente no relativo ao plan de viabilidade que está obrigada a presentar. O secretario xeral técnico da Vicepresidencia Segunda, Pablo Casal, e Ángel Bernardo Tahoces, director xeral de Planificación Enerxética e Recursos Naturais, informaron que a Xunta pediu a XEAL o plan de viabilidade pero que a empresa remitiu un simple plan de investimentos, que están a analizar.

Diante disto, engadiron, dende a Consellaría volvéuselle solicitar un plan conforme ao establecido nas cláusulas, mais a resposta de XEAL foi presentar un recurso contencioso administrativo contra o requirimento da Administración galega. "Unha mostra máis da fraude da operación de venda e de que o único interese de TPG-Ithaka está no negocio da enerxía e non na produción de ferroaliaxes", denuncia o presidente do comité, Alfonso Mouzo (CIG).

Con todo, e segundo matizaron os representantes da Xunta, a dirección si remitiu outro proxecto industrial á Consellaría mais sen renunciar a continuar adiante co contencioso-administrativo, que se viría sumar así ao recurso xa presentado por Ferroatlántica e que mantén XEAL, contra a resolución de Augas de Galiza impedindo a segregacións das centrais hidroeléctricas.

Necesidade de actuar sobre as concesións

Para o comité está nova actuación da empresa evidencia a necesidade de actuar de inmediato sobre as concesións, tendo en conta que XEAL está ignorando e incumprindo as esixencias da Administración autonómica e que é preciso salvagardar o interese público ao que se refiren as cláusulas. Ademais, permitir que a empresa continúe desmantelando as fábricas e perdendo mercado compromete seriamente a viabilidade das plantas. "Non se pode consentir que unha empresa explote os recursos naturais que son de todas e todos os galegos para tirar beneficio e que iso non reverta no mantemento da actividade produtiva e dos postos de traballo", asevera Mouzo.

Neste senso, o encontro desta mañá, que dá continuidade á xuntanza do pasado 1 de outubro con Francisco Conde, confirma tamén as malas novas trasladadas ao comité pola alcaldesa de Cee, tras da reunión que tiveron a empresa e as/os rexedoras/es da comarca. Na mesma, a dirección negouse a clarificar un calendario para o rearranque dos fornos, non descartou aplicar un novo ERTE tras o remate da regulación vixente (a segunda neste ano), nin explicou cales son as previsións de produción e de investimentos.

Nova concentración este venres

Ante esta situación, os traballadores e as traballadoras continuarán co calendario de mobilizacións semanais e para mañá, venres 23 de outubro, ás 19:00 horas, está convocada nova concentración diante da Casa do Concello de Cee.

Volver