A Inspección de Traballo vén de requirir a Monbus que elabore e implante un protocolo de actuación en situacións de violencia externa, nos urbanos de Santiago, para que facilite formación ás traballadoras e traballadores e para que garanta o dereito de información e consulta das e dos seus representantes legais.
O pasado 29 de setembro, unha traballadora do servizo de transporte urbano de Compostela sufriu unha agresión. Ese mesmo día, a CIG denunciou que Monbus, lonxe de activar protocolo ningún, a mantivo conducindo durante horas. A central sindical considerou, ademais, que a empresa debería ter parado o autobús, avisado a unha ambulancia para o seu traslado a urxencias e que se avaliara o seu estado.
Porén, a traballadora, ademais de continuar durante horas o seu servizo, unha vez o rematou tivo que desprazarse polos seus propios medios ao centro de saúde.
Pero esta non foi a única agresión sufrida polo persoal do transporte urbano de Santiago. No mes de abril deste ano outros dous condutores foran agredidos e malia o comité solicitar unha reunión, Monbus anulouna ata en dúas ocasións sen realizar ningunha investigación sobre os feitos.
Denuncia na Inspección
A raíz destes sucesos, a FGAMT-CIG presentou un escrito perante a Inspección de Traballo para que comprobara o proceder da empresa e determinara se a forma de actuar de Monbus fora a correcta.
Hoxe mesmo recibiuse a resolución da Inspección de Traballo que, tal e como demandaba a CIG, obriga a Monbus a elaborar un protocolo para prever as agresións e para determinar a actuación das traballadores e traballadores ante casos como estes.
Para a CIG este requirimento da Inspección, que agarda que Monbus acate á maior brevidade, demostra a situación de estrés laboral na que o persoal do transporte urbano vén traballando desde hai anos.