A II Asemblea Comarcal da CIG-Industria de Vigo celebrada este xoves reelixiu a Xulio Fernández Alonso como secretario comarcal por 61 votos a favor e 1 en branco. Durante a sesión, que tivo lugar no local do sindicato na cidade, tamén se renovou a Executiva Comarcal e escolléronse os representantes da federación nos Consellos Federal e Comarcal e na Dirección Comarcal.

A federación de Industria da CIG de Vigo celebrou na tarde deste xoves a súa II Asemblea Comarcal baixo o lema “Compromiso constante, organización e loita', na que Xulio Fernández resultou reelixido secretario comarcal para os vindeiros catro anos. A candidatura de Fernández, a única presentada ao proceso, logrou 61 votos a favor e 1 en branco. Na sesión participaron un total de 62 delegados/as dos 73 censados/as.

Tamén se renovou a Executiva Comarcal, que saíu adiante por 61 votos a favor e 1 en contra; o mesmo resultado obtiveron os representantes da federación no Consello Federal. Finalmente, escolléronse os membros do Consello e da Dirección Comarcais.

Durante a sesión, que se iniciou coa intervención do secretario nacional da CIG-Industria, Xoán Xosé Bouzas, debateuse o sobre o Informe de Xestión, documento que recolle os principais aspectos da acción sindical desenvolvida pola federación nos catro últimos anos e que foi aprobado por unanimidade.

Medrar en afiliación e representación

Tras o reconto das papeletas e o nomeamento do secretario comarcal e da nova Executiva, Xulio Fernández tomou a palabra para agradecer a confianza depositada nas persoas que se encargarán de dirixir a federación na comarca de Vigo os vindeiros catro anos e adiantar que os retos máis inmediatos pasan por reforzar a organización para dar unha resposta máis áxil á problemática da clase traballadora e por incrementar a afiliación e a representación nas empresas para ampliar a presenza da central sindical nos centros de traballo.

Neste senso, chamou a non conformarse con ser a primeira forza obreira da comarca e apostou por seguir a estender o proxecto que representa a CIG “como ferramenta máis útil para a defensa dos intereses da maioría social”.

No tramo final do seu discurso fixo unha mención expresa ao proceso soberanista aberto en Catalunya e ao apoio que dende a central sindical se lle está a dar dende o primeiro momento. “Somos unha organización nacionalista, e como tal imos estar na rúa solidarizándonos con todas as loitas dos pobos sen Estado que aspiren a exercer lexitimamente o dereito de autodeterminación”.

Finalmente, advertiu sobre a oportunidade que se lle presenta neste contexto ao Estado español para incrementar a represión sobre os pobos e as organizacións que cuestionen tanto o sistema capitalista como a configuración territorial e lembrou que a CIG aspira a construír unha Galiza ceibe e socialista. O encontro pechouse coa interpretación do Himno galego.

• II Asemblea Comarcal CIG Industria