A folga do persoal de Elecnor, contrata de R, para esixir a subrogación será indefinida a partir do luns 11

O persoal pontevedrés secundou paros e desenvolveu mobilizacións dende o 28 de marzo

Vigo/Pontevedra -

O persoal pontevedrés de Elecnor, empresa vasca encargada dos traballos de instalación e mantemento da compañía R Cable, acordou que a folga para reclamar a subrogación por parte da nova compañía encargada do servizo pasará a ser indefinida a partir deste luns 11 de abril.

Dende o pasado 28 de marzo os traballadores/as secundaron de xeito total numerosas xornadas de folga e levaron a cabo unha intensa campaña de mobilizacións, tanto diante da propia empresa no polígono industrial do Rebullón, en Mos, como ás portas de R en Vigo. 

Arredor de 40 empregados/as serán despedidos cando remate a concesión

Dende a CIG-Industria denuncian que os empregados/as de Elecnor quedarán na rúa no caso de que a nova subcontrata, a empresa valenciana Obremo, non asuma os seus contratos, algo que si fixo na provincia de Ourense. Isto foi posíbel porque o convenio colectivo provincial do Siderometal ourensán contempla a subrogación entre empresas privadas, algo que non figura no convenio de Pontevedra. Deste xeito, cando remate a concesión os arredor de 40 traballadores/as de Elecnor serán despedidos/as se R Cable non lle reclama á nova subcontrata que os subrogue.

Elecnor, cuxa representación sindical está formada por 2 delegados/as de persoal da CIG e 1 de CCOO, ten o seu centro de traballo no polígono do Rebullón, en Mos, pero os seus empregados/as prestan servizo de instalación e mantemento para R Cable por toda a provincia de Pontevedra.

Volver