Grupo Norte empraza ao comité a unha nova xuntanza para eliminar as discriminacións por xénero

As traballadoras volveron mobilizarse este xoves en demanda de “a igual traballo, igual salario”
Compostela - 21 Xun 2018

As traballadoras de Grupo Norte, concesionaria do servizo de limpeza da Xunta, concentráronse un xoves máis diante do edificio administrativo da Xunta de Galiza, en San Caetano, para denunciar a discriminación que sofren por ser mulleres e demandar igualdade salarial e de dereitos. O comité, que mantivo onte unha xuntanza con representantes da empresa, presentou unha nova proposta. Grupo Norte emprazou ás/aos representantes das traballadoras a unha nova reunión que convocará tras valorala.

Tal e como estaba previsto, onte celebrouse unha xuntanza entre comité e Grupo Norte. O seu inicio foi, segundo explica o representante da CIG, Anxo Noceda, “moi tenso” porque a empresa presentou unha proposta “máis regresiva aínda que a anterior”.

Diante desta situación, a representación sindical solicitou un receso tras do que puxo sobre a mesa outra proposta na liña da anterior, pero con matices, para facilitar un achegamento entre as partes.

Noceda sinala que demandaron o recoñecemento da categoría de peón especialista, de forma inmediata, para todas as traballadoras con dous trienios de antigüidade acumulados; o recoñecemento desa categoría a todo o persoal que en diante vaia cumprindo esa antigüidade e facilidades para ir axeitando os salarios ao incremento que esa nova categoría suporía.

Así, a todas as traballadoras que adquiriran esa condición se lles recoñecería un incremento do 25% do seu salario a partir de xullo; outro 25% en xaneiro de 2019; un 25% máis en xaneiro de 2020 e o 25% restante en xaneiro de 2021.

“A proposta foi recollida pola empresa que agradeceu o esforzo da parte social e se comprometeu a estudala, emprazándonos a unha seguinte reunión para a que aínda non temos fixada data”, sinala Noceda.

Desigualdades

Deste xeito comezaría a solucionarse a discriminación salarial e de dereitos que denuncian as traballadoras que, a diferenza dos seus compañeiros, non teñen, ningunha, a categoría de peón especialista, nin cobran, tampouco ningunha, pluses de perigorisade, toxicidade ou penosidade. Unha situación que provoca unha evidente fenda salarial entre traballadores e traballadoras que desenvolven labores semellantes.

Ao remate da mobilización celebraron unha xuntanza diante mesmo da consellaría de Presidencia, onde avaliaron esta nova proposta e acordaron continuar, mentres non se resolva, coas mobilizacións. A vindeira terá lugar o próximo xoves día 28 de xuño.