A comunidade educativa do CIFP Manuel Antonio esixe na Xunta en Vigo rematar cos problemas derivados das obras
A comunidade educativa do Centro Integrado de Formación Profesional (CIFP) Manuel Antonio de Vigo desenvolveu hoxe, co apoio da CIG-Ensino, unha concentración diante da delegación da Xunta na cidade coincidindo co paro de tres horas convocado para reclamar solucións aos problemas causados polas obras de acondicionamento e máis democracia no ensino, que o feito de que as direccións dos CIFP sexan escollidas “a dedo” pola Consellaría de Educación é unha das causas da falta de diálogo e de participación no centro.
As protestas repítense dende hai varios meses debido á forma en que se están a realizar as obras de reparación das cubertas do instituto, que chegaron fóra de tempo e xeraron numerosas molestias para profesorado, persoal non docente e alumnado. A comunidade educativa denuncia a falta de coordinación, de comunicación e de resposta por parte da Consellaría ás demandas formuladas.
Segundo explica o persoal docente, a situación chegou a provocar filtracións de auga, pingueiras, baños anegados, charcos nas aulas, presenza de fungos e deterioro de material, xerando un ambiente pouco saudable para o desenvolvemento normal da actividade educativa.
Polo que a comunidade educativa do centro reclama que se facilite o Plan de Prevención de Riscos Laborais solicitado a comezo de curso, así como a realización de medicións de posibles contaminantes, cuestións que xa lle foron trasladadas ao Instituto Galego de Seguridade e Saúde Laboral (ISSGA).
Outra das cuestións que motivaron paro e as protestas ten que ver con que a direccións deste tipo de centros non é elixida pola comunidade educativa, senón designada directamente pola Consellería, o que consideran unha das causas de falta de diálogo e de participación.
A CIG-Ensino levou este tema á Mesa Sectorial e solicitou que se convoque o Comité de Seguridade e Saúde Laboral da Consellaría, sen que polo momento a Dirección Xeral de Recursos Humanos atendera as súas peticións. Ademais tamén contactou por teléfono e por escrito co Servizo de Prevención de Riscos Laborais do departamento autonómico, que mantén que a avaliación de riscos se fará unha vez rematen as obras.
Finalmente, o profesorado sinala que esta mobilización forma parte tamén dun contexto máis amplo de protestas no ensino público galego, marcado pola imposición dunha reforma da FP que está a deteriorar moito estas ensinanzas, unha gran carga burocrática, ratios elevadas, falta de medios para atender á diversidade e ausencia de resposta da Consellería ás demandas do sector.
Principais demandas da comunidade educativa do Manuel Antonio
- Recibir información sobre as obras e as súas consecuencias.
- Ter acceso ao Plan de Prevención de Riscos Laborais e que se realicen medicións de posibles axentes contaminantes.
- Convocar o Consello Social do instituto.
- Convocar un claustro para debater as propostas do profesorado.
- Reclamar a elección democrática das direccións nos CIFP.
