A CIG volve mobilizarse diante de Abanca en Salvaterra esixindo a readmisión da delegada despedida
Persoas delegadas da federación de Banca da CIG mobilizáronse este xoves diante da oficina de Abanca en Salvaterra do Miño ao berro de “Represión sindical, terrorismo patronal” e “Montse readmisión” para denunciar novamente o despido “inxusto e inxustificado” dunha traballadora desta sucursal -delegada no comité de empresa provincia de Pontevedra- pola súa actividade sindical.
En consecuencia, a CIG-Banca recorreu xudicialmente a decisión e, despois dalgúns atrancos, o xuízo -que ía celebrarse no mes de abril- está fixado finalmente para o mes de setembro. Dende a central sindical sosteñen que o despido “non foi un feito casual nin ao azar, senón que foi un acto deliberado contra unha compañeira que exerceu activamente o seu papel como delegada sindical, e foi parte importante no traballo desenvolvido pola sección sindical da CIG nos meses anteriores á exitosa folga do 11 de xaneiro de 2024, na que o persoal de Abanca botouse á rúa para denunciar a política de abusos da empresa e a continua perda de poder adquisitivo; mentres Abanca publicaba cuantiosos e escandalosos beneficios.”
Ademais da permanente acción sindical desenvolvida pola CIG, foron presentadas catro demandas contra a empresa nos meses posteriores. Na última delas, que foi por vulneración da liberdade sindical na negociación do anterior plan de igualdade, a sección sindical subliña que “estaban implicadas as mesmas persoas instrutoras do expediente a medida que pretende xustificar o despedimento da nosa compañeira”.
Tal e como anunciou o secretario da sección sindical da CIG en Abanca, Clodomiro Montero, durante a concentración, o sindicato non vai cesar na loita contra un despedimento co que pretenden amedrentar ao sindicato para que non continúe denunciando as constantes irregularidades e abusos que comete Abanca acotío. “A dirección ten que tomar nota de que seguiremos defendendo os dereitos do persoal e seguiremos a carón de Montse, na seguridade da súa completa inocencia nos feitos que se lle imputan”.
