A CIG-Saúde denuncia o acordo entre o conselleiro de Sanidade e os Colexios Médicos saltándose a Mesa Sectorial
Na reunión do Consello Técnico de Atención Primaria do 30 de maio, a CIG-Saúde denunciou a falta de respecto do conselleiro de Sanidade, Antonio Gómez, cara ás organizacións sindicais presentes na Mesa Sectorial, e cara ao propio Consello Técnico, tras o anuncio nos medios de comunicación dun acordo cos Colexios Médicos sobre o XIDE.
Esta cuestión tiña que ser tratada na Mesa Sectorial "e a Consellaría tiña a oportunidade de facelo tanto na reunión de onte do Consello Técnico, como hoxe no marco da reunión da Mesa Sectorial", subliña o secretario nacional da CIG-Saúde, Manuel G. Moreira. Lembra ademais que a implantación do programa XIDE non é unha problemática cinxida aos e ás profesionais médicas, senón que afecta ao persoal das áreas de administración, que se ten queixado en numerosas ocasións -chegando incluso a mobilizarse- pola sobrecarga de traballo que lles provoca e a situación de inseguridade xurídica que lles xera.
Moreira sinala que o conselleiro de Sanidade "pode reunirse con quen estime oportuno", pero debe respectar os órganos de representación legalmente estabelecidos cando trate temas que afecten ás condicións laborais e que xa foran previamente tratados na mesa Sectorial e no Consello Técnico.
A CIG-Saúde defende a voluntariedade na colexiación, cando menos para as persoas que traballan na sanidade pública, pero "non podemos recoñecer os colexios profesionais como interlocutores que substitúan os órganos legais de representación".
