A CIG-Saúde alerta sobre as deficiencias nos novos servizos do Complexo Hospitalario Universitario de Ourense
A CIG-Saúde vén de remitirlle un escrito á Xerencia da área sanitaria ourensá denunciando o estado da Unidade de Recuperación Post-Anestésica (URPA) posta en marcha o pasado domingo día 23 no Complexo Hospitalario Universitario de Ourense (CHUO) e reclamando a dotación do equipamento e do persoal necesarios para o seu correcto funcionamento.
Dende a central sindical explican que o pasado 14 de marzo o propio presidente da Xunta, Alfonso Rueda, visitou a nova Unidade de Coidados Intensivos (UCI) do CHUO, que supuxo un investimento autonómico de máis de 10 millóns de euros e que segundo o Sergas está deseñada para reforzar a atención sanitaria na provincia. O máximo responsábel do Goberno galego asegurou durante a visita que o obxectivo desta infraestrutura é “garantir que esta área conta cos aparellos e a tecnoloxía máis moderna para ofrecer o mellor servizo é ao mesmo tempo que sexan espazos cada vez máis humanizados”.
O Sergas sinalou que o novo espazo UCI está dotado de tres módulos con 10 boxes cada un, “algo totalmente falso xa que a UCI de Ourense conta na actualidade con 20 camas e non con 30 (un10% menos que as que existían antes da pandemia)”. Unha redución de camas que -tal e como sosteñen na CIG- está a xerar dificultades para a atención a persoas doentes críticas.
Neste senso, detallan que a unidade 4ª dereita creada na fase 1 con 10 boxes, e inaugurada hai pouco máis dun ano, atópase a día de hoxe pechada e desmantelada de todo o equipamento previo, “polo que un espazo novo con 10 camas está sen uso e sen a preparación necesaria para a súa posta en marcha de xeito inmediato se fose preciso”.
Ao mesmo tempo, durante as obras da segunda fase da UCI habilitouse o espazo URPA para acoller doentes críticos de xeito temporal, “algo que nunca foi axeitado pero que se asumiu como necesario para poder realizar as obras”. A pesar de que este espazo non está dotado co material necesario para este tipo de persoas doentes críticos é o empregado para darlle soporte a situacións de sobreaforo”.
Apertura sen medios nin persoal
O pasado domingo día 23 ás 22:00 horas habilitouse a URPA para persoas doentes críticas como consecuencia da saturación existente. “A apertura deste espazo ten que realizarse coa dotación de material axeitado para este tipo de persoas doentes críticas, mais non foi así”.
Na central sindical son conscientes da dificultade para xestionar as situacións de sobreaforo, “pero dende logo non imos permitir que se fagan anuncios de novos servizos falsos e que iso vaia en detrimento do material e da tecnoloxía noutros espazos; polo que imos a seguir denunciando as situacións que poñan en risco a asistencia sanitaria que dan as nosas profesionais, xa que para ofrecer coidados de calidade hai que contar cuns mínimos que non se están cumprindo”.
Ademais alertan sobre o esgotamento, o medo e a inseguridade cos que o persoal ten que desenvolver o seu traballo, un contexto no que se abriu a unidade URPA sen contar con carros de parada, vía aérea e acceso vascular, sen respiradores nin medicación para persoas doentes críticas, sen latiguillos para os monitores, sen cortinas para separar aos doentes e sen bombas de infusión para medicamentos. “Algunhas destas deficiencias foron solucionadas, pero moitas outras non”. Ao que hai que engadirlle o déficit de persoal existente para poder cumprir os ratios “axeitados e seguros” para atender persoas doentes críticas.
