A CIG repudia a represión salvaxe na Arxentina e traslada a súa solidariedade co colectivo de persoas xubiladas e mobilizadas
A Confederación Intersindical Galega (CIG) condena rotundamente a violencia e represión que o goberno fascista de Milei levou a cabo, o pasado mércores, contra a multitude que se manifestaba contra as súas políticas, e en apoio ao colectivo de persoas xubiladas e pensionistas. Como veñen facendo cada mércores, mobilizábanse diante da sede do Congreso da Nación para reclamar un aumento de emerxencia, que se estenda a moratoria previsional e que se constitúa o fondo de garantía de sustentabilidade da caixa de xubilación ANSES, para que se normalice o funcionamento das prestacións sociais e de saúde do PAMI.
A actuación desproporcionada e violenta das forzas represivas contra as persoas que se manifestaban ocasionou un importante número de feridas, algunhas de gravidade, como un fotógrafo de prensa ao que lle impactou un bote de gas na cabeza.
Esta actuación, xunto á participación de xendarmes e persoas infiltradas, lembran os peores tempos da ditadura. E todo isto, mentres no Congreso montaban un número teatral para evitar votar en contra o DNU, que outorga plenos poderes á figura do Presidente da República.
Desde a CIG trasladamos a nosa solidariedade ao colectivo de xubilados e xubiladas e, en xeral, á clase traballadora arxentina, esiximos ao Goberno de Milei o respecto polos dereitos cívicos e democráticos do pobo arxentino, comezando pola inmediata liberación das persoas detidas, a correspondente investigación sobre a violenta resposta represiva, e a depuración das responsabilidades que dela deriven.
En Santiago de Compostela, ao 13 de marzo de 2025.