A CIG reclámalle a Naturgy que manteña na Coruña os servizos de atención telefónica á clientela

A eléctrica vai deslocalizar máis do 80% do servizo pondo en risco 90 empregos en Teleperformance
A Coruña - 28 Xul 2022

Traballadoras e traballadores de Teleperformance concentráronse este xoves diante das oficinas que a empresa ten no Polígono da Agrela na Coruña en defensa da continuidade dos 118 postos de traballo no servizo de atención telefónica á clientela de Unión Fenosa (Grupo Naturgy). A sección sindical da CIG denuncia que tras máis de 25 anos prestándose dende este centro de chamadas, a compañía eléctrica vai deslocalizar o servizo a partir do mes de setembro, cando pasará a ser realizado en máis dun 80% dende Colombia, deixando só 20 persoas na Coruña.

Pero ademais, este proceso estase realizando sen apenas información por parte de Teleperformance, que malia asegurar que tentará recolocar as 90 persoas afectadas, "non está ofrecendo ningunha garantía real". Tino Fernández explica que a sección sindical da CIG se dirixiu á empresa para que aclare todas as cuestións relativas á recolocación deste persoal: como se fará, que formación van recibir, que persoas das 118 van quedar no servizo e que criterios se utilizarán para a escolla. "Pero de momento só recibimos a calada por resposta", critica.

Diante desta incerteza, a CIG concentrouse este xoves diante de Teleperformance e xa avanza que seguirá mobilizándose para defender os postos de traballo na Coruña e garantir tamén os dereitos da cidadanía.

Perda continuada de emprego na plataforma da Coruña

Até agora, subliña a representación da CIG, este servizo préstase, tanto en galego como en castelán, desde a delegación de Teleperformance na Coruña, dando cobertura a toda a clientela da distribuidora (UDF) do Grupo Naturgy, non só en Galiza, senón tamén nas outras zonas do Estado español, onde esta compañía ten despregada a súa rede de distribución.

Nos últimos anos en Teleperformance A Coruña, debido a estes procesos de deslocalización e cambio de contratas, destruíronse máis de 300 postos de traballo, perdéndose buques insignia da delegación como R Cable, Naturgy, Orange, e agora UFD, onde chegou a haber máis de 900 persoas empregadas.

Desde hai xa uns cantos anos, advirte a sección sindical da CIG, é práctica habitual que o Grupo Naturgy (antiga Fenosa), traslade os postos de traballo dos servizos de atención á clientela das empresas do seu grupo, fóra do país, coa conseguinte destrución de emprego. Así pasou en 2013, cando a daquela “Gas Natural Fenosa” decidiu eliminar a atención á clientela da súa filial “Unión Fenosa Comercial” ou en 2019 cando se deslocalizou para Reus o servizo de atención do mercado regulado de GNSUR (actual Comercializadora Regulada Gas& Power).

Todos estes servizos estaban sendo atendidos desde varios puntos de Galiza, a maioría desde Teleperformance A Coruña, e pouco a pouco foron marchando para fóra. Agora a eléctrica quere deslocalizar a atención telefónica da súa distribuidora que é a onde se dixiren as e os clientes cando teñan calquera problema coa súa subministración eléctrica, para notificar cortes, avarías, subas de tensión, altas e baixas do servizo de electricidade, reclamacións etc.

Deste xeito quedarían só 20 persoas para atender o servizo en galego dende A Coruña. Unha cifra que Fernández considera insuficiente para atender a demanda de atención na nosa lingua, tendo en conta que este persoal se distribúe en varias quendas.

Nin dereitos laborais nin calidade no servizo

Para a sección sindical da CIG resulta moi preocupante esta situación por todo o que conleva a nivel de emprego, mais tamén advirte das consecuencias deste modelo de atención deslocalizado, no que prima o puramente económico sobre a calidade da atención á cidadanía, os seus dereitos como consumidores e os dereitos laborais dos traballadores e das traballadoras que dan o servizo.

"Os procesos de deslocalización, pola experiencia acumulada, non garanten a calidade na atención, porque non apostan por este modelo de atención, senón por un puro criterio de ganancia empresarial", salienta a sección sindical. Fronte a este criterio, a CIG reitera que "necesitamos un modelo que atenda mellor á clientela. Precisamente por iso sempre defendimos a necesaria profesionalización do sector dos centros de chamadas, apostando sempre pola calidade e garantía total dos servizos".

"Queremos e defendemos outro modelo de atención á clientela, que aposte por manter e aumentar estes postos de traballo aquí, no país. E defendémolos tamén como garantía necesaria, non só na defensa dos dereitos lingüísticos e da calidade da atención da cidadanía, senón tamén para termos un emprego de calidade e con condicións laborais dignas para as persoas que traballamos no sector".