![Confederación Intersinidical Galega](/assets/cig/2022/logos/cig.png)
A CIG reclama a convocatoria da mesa das Pontes, un plan industrial de choque e o concurso de transición xusta cos 1400MW
![](assets/images/e/24-03-14_ConcentracionTransicionXusta_08-532086ce.jpeg)
A CIG continuou esta tarde en Ferrol coas mobilizacións para reclamar unha transición xusta, garantías na continuidade do emprego e políticas de reindustrialización que doten de futuro á localidade. Neste xoves, as protestas trasladáronse até o edificio administrativo da Xunta en Ferrol para reclamarlle ao Goberno galego que convoque de inmediato a mesa para o impulso económico das Pontes.
![](imaxes/adaptadas/780/files/novas/2024/03/14/As%20Pontes/24-03-14_ConcentracionTransicionXusta_04.jpeg)
As reivindicacións para unha verdadeira transición xusta nas Pontes que levaron a CIG a convocar folga xeral na vila o pasado 23 de novembro e a concentrarse o 23 de xaneiro na Praza do Carme, teñen toda a súa vixencia ante as nulas respostas e actuacións dos Gobernos galego, español e do Concello das Pontes, mentres Endesa executa o seu plan coa pasiva colaboración das administracións.
Non se están cumprindo coa continuidade dos postos de traballo das auxiliares entre o peche e o predesmantelamento anunciado no marco da Mesa para o impulso da actividade económica das Pontes; e a Xunta segue sen atender as solicitudes de convocatoria da mesa para resolver esta situación, avanzar no cronograma do desmantelamento e na concreción e posta en marcha dos proxectos industriais anunciados.
Precisamente, coa protesta desta tarde reclamóuselle ao Goberno galego que de inmediato proceda á reunir a mesa "porque a situación que vive As Pontes é límite" e nin se están cumprindo os acordos nin se están materializando as propostas industriais anunciadas a todo bombo. Ao contrario, lonxe de concretarse alternativas que dean futuro, a día de hoxe hai 113 postos de traballo menos en Einsa.
![](imaxes/adaptadas/780/files/novas/2024/03/14/As%20Pontes/24-03-14_ConcentracionTransicionXusta_06.jpeg)
Neste contexto, urxe que se cumpra coa reivindicación da creación dun plan industrial de choque, con financiamento das administracións autonómica e estatal e coa participación sindical na súa xestión, a través do que se garantan a creación de chan industrial, que dea garantías a reindustrialización das Pontes.
Recuperar os 1.400MW de evacuación
Pois tampouco existe a certeza de manter os 1.400MW de evacuación da Central Térmica no nó de Transición Xusta das Pontes e a súa ligazón a proxectos industrias. O anuncio do MITECO, feito en plena campaña electora, da inclusión na modificación da planificación de REE (en trámite) dunha nova subestación -que non central de transformación-, sen sinalar que capacidade terá e se será clasificada como de transición xusta "non é unha solución, é unha fraude".
A CIG esixe a inmediata convocatoria do concurso porque canto máis se tarde en facelo máis se estará impedindo unha transición xusta e unha reindustrialización que xere emprego nas comarcas afectadas, hoxe camiño da desertización social, económica e laboral.
![](imaxes/adaptadas/780/files/novas/2024/03/14/As%20Pontes/24-03-14_ConcentracionTransicionXusta_11.jpeg)
A este respecto, a central demanda que ao Goberno español que atenda a iniciativa aprobada (a proposta do BNG) na Comisión de Transición Ecolóxica e Reto Demográfico do Congreso para garantir unha transición xusta real para As Pontes, que se manteña a capacidade de evacuación que tiña asignada a central térmica de Endesa e se proceda á convocatoria inmediata e urxente do concurso público co mesmo procedemento empregado para adxudicar o acceso ao nó de transición da CT de Andorra-Teruel.
Hai que denunciar que esta iniciativa do BNG recibiu os votos en contra dos partidos que compoñen o Goberno do Estado, PSOE e Sumar. Cómpre pois, seguir na mobilización até que haxa solucións que garantan un futuro con emprego e industria para As Pontes.