A CIG participa na II reunión rexional dos Sindicatos por unha enerxía democrática
Baixo o título “Construíndo un camiño público para unha transición xusta”, celebrouse, na cidade de México, a 2ª reunión rexional dos Sindicatos por unha Enerxía Democrática (TUED, polas súas siglas en inglés), durante os pasados días 4, 5 e 6 de febreiro, coa colaboración especial, como anfitrións, do Sindicato Mexicano de Electricistas (SME), e a participación de máis de 100 persoas de organizacións de diferentes continentes, entre as que se encontraba a CIG.
Rede TUED
A Rede TUED, á que a CIG se sumou xa hai varios anos, xurdiu como consecuencia dos debates de Río+20, onde se promovía “privatizar para descarbonizar” como solución única ao cambio climático, o que suporía debilitar os sindicatos, privatizar servizos públicos e tratar a enerxía como mercancía, non como un dereito de todas as persoas. Neste encontro, TUED Sur consolídase como rede sindical para defender a propiedade pública e o control democrático da enerxía, con México como referente en soberanía enerxética, tras reverter as privatizacións de sexenios anteriores. Tamén tiveron especial protagonismo nas xornadas outros casos como Colombia, Brasil, Indonesia ou Sudáfrica, por citar algúns.
O encontro concluíu que a transición debe ser pública, con participación de consellos obreiros e comunitarios. "Non bastan empresas estatais: hai que crear mecanismos de control e rendición de contas", aseverouse. Ademais, destacouse a necesidade de “politizar a enerxía”, cuestionando o seu uso actual e priorizando sistemas que dignifiquen a vida e o traballo. Porque non haberá transición enerxética sen dereitos laborais.
Numerosos e diversos debates
Durante décadas, o Sur Global vén enfrontado problemáticas como a pobreza enerxética, a sobreexplotación de combustíbeis fósiles, os efectos do cambio climático, a escaseza de recursos e entornos políticos represivos.
Por iso, o principal obxectivo destes encontros é a articulación e organización entre distintos sectores da sociedade, para disputarlle o poder ás empresas privadas, nunha verdadeira transición xusta. Movementos obreiros, campesiños, e sindicais, veñen construíndo alternativas ao capitalismo neoliberal, destacando o papel central dos sindicatos, ao vincular a loita polos empregos dignos con esa transición enerxética xusta.
Cunha apertada e intensa axenda, o encontro afrontou diversos debates:
- Avances e situación actual nas distintas rexións continentais
- Por qué a loita por un camiño público é unha loita de mulleres sindicalistas?
- Características da alternativa do camiño público ao enfoque neoliberal da transición enerxética e a súa evolución.
- Recuperación paso a paso. Algúns exemplos a seguir, como o caso de México, que foi recuperando o dominio público de grande parte dos seus recursos enerxéticos. Con representantes do SME e do goberno de México.
- Debate sobre o documento de traballo “Cara unha nova orde enerxética internacional ”
- Mesas redondas rexionais. Cartografía das oportunidades do camiño público no Sur Global, con sindicatos de Asia-Pacífico, África e América Latina e o Caribe.
- Desenvolvemento dun enfoque de camiño público para as accións tecnolóxicas
- Novas achegas ao documento sobre a nova orde enerxética. O Sur debe asumir o liderado mundial da transición enerxética, ir máis aló de lembrarlle ao Norte as súas obrigas e desenvolver unha alternativa ao marco político do crecemento ecolóxico baseada nos bens públicos mundiais. As economías de rápido crecemento do Sur deben abordar a súa crecente demanda enerxética e o aumento do uso de combustíbeis fósiles (especialmente en Asia-Pacífico), levar a cabo un programa de acción Sur-Sur (dispón dos medios para crear un "consorcio de cooperación" que proporcione axuda material e transferencia de tecnoloxía), incidindo en rematar coa escaseza de enerxía, e volver comprometer o Norte en termos diferentes (cómo liberar a transición tanto das preocupacións de competitividade a ultranza como do "proteccionismo verde”).
- Que significa para o Sur Global a política de industrial verde?
- Sesión de solidariedade con Palestina. - Qué tipo de accións, iniciativas e campañas de liderado sindical precisa TUED Sur para facer avanzar realmente o camiño público? - Iniciativa de liderado fem
- Sesión de solidariedade con Palestina.
- Qué tipo de accións, iniciativas e campañas de liderado sindical precisa TUED Sur para facer avanzar realmente o camiño público?
- Iniciativa de liderado feminino para un camiño público. Experiencias nas diferentes rexións continentais.
- Cara unha unidade de acción. Existen oportunidades de conseguir apoio gobernamental/ministerial para unha axenda de cooperación, liderada por África e/ou o Sur, a redor da enerxía, o clima e o desenvolvemento de alto valor engadido?
- O papel da investigación do camiño público: o traballo de RedCaPu (Rede Camiño Público) en América Latina.
- Accións e intervencións previstas en todas as rexións.
- Cara a COP 30. Preparativos organizativos e programáticos.
Cidade de México a 9 de febreiro de 2025
Departamento de Relacións Internacionais da CIG
