A CIG organiza unha xornada de debate sobre o fondo de compensación para as vítimas do amianto
A CIG de Ferrol organiza o próximo venres, 21 de marzo, unha xornada de debate sobre a demora na posta en marcha do fondo de compensación para as vítimas do amianto, as limitacións na reparación ás persoas afectadas por este axente canceríxeno, así como as propostas da central para garantir que se faga xustiza social.
O acto decorrerá no Centro Cultural Carvalho Calero de 11h a 14h e contará coa participación do secretario nacional da CIG-Industria, Xoán Xosé Bouzas Aboi; o avogado de AGAVIDA, Víctor López Casal; a pneumóloga, Carmen Diego; e o deputado do BNG no Congreso español, Néstor Rego.
A CIG decidiu organizar esta xornada pola importancia desta problemática en toda Galiza, con especial incidencia na comarca de Ferrol, por xustiza social, pola urxencia da súa efectivización e para aclarar certas cuestións que son da máxima importancia para as persoas afectadas, que tiñan unha lexítima expectativa de ser beneficiarias deste fondo, pero que coa actual redacción da norma quedarán fora deste mecanismo.
A creación dun fondo de compensación é unha histórica reivindicación do sindicalismo como mecanismo de reparación integral para as vítimas do amianto sen que teñan que acudir a xustiza. Fondos deste tipo xa existen dende hai anos noutros estados da UE como Francia, Holanda ou Bélxica.
Atraso inxustificábel
Hai que lembrar que o 19 de outubro de 2022, tras un longo camiño parlamentario, publicábase no BOE a Lei 21/2022, de creación dun fondo de compensación. O inicio da súa actividade dependía da aprobación dun regulamento para o que a propia lei estabelecía un prazo máximo de tres meses (20 de xaneiro de 2023). Porén, transcorridos máis de dous anos nin o regulamento está desenvolto nin as vítimas poden acceder aos cartos, malia que non dispoñen de prórrogas.
Unha demora totalmente intolerábel que se suma ao atraso acumulado polo Estado español no resarcimento polo dano inxusto padecido polas vítimas do amianto. A día de hoxe, as persoas afectadas continúan tendo que loitar en procesos administrativos e xudiciais moi engorrosos e longos para que se lle recoñeza a súa enfermidade e o dereito á reparación.
No seu momento, a CIG manifestou a súa disconformidade co borrador do regulamento presentado polo Goberno español por restrinxir o acceso ás compensacións a determinadas patoloxías, reducir as contías con respecto ás que recoñece a xustiza, limitar a dotación do fondo a 25 millóns de euros, carecer de perspectiva de xénero, fixar a necesidade de contar cun recoñecemento administrativo ou xudicial previo, ou non estabelecer exencións tributarias para estas indemnizacións.
Na xornada deste venres abordaranse estas cuestións e por parte da CIG exporanse tamén as propostas e consideracións trasladadas para garantir que se faga xustiza efectiva coas vítimas do amianto.
