A CIG mobilízase contra o acoso laboral e a represión sindical no asilo do Carballiño
Representantes sindicais da CIG mobilizáronse hoxe diante da sede da Fundación Hermanos Prieto e do Concello do Carballiño para rexeitar o clima de acoso laboral e a represión sindical que se vive no asilo da localidade ourensá. Nos vindeiros días a central levará as protestas até o Bispado de Ourense, que tamén forma parte do padroado da Fundación.
A concentración diante da residencia da terceira idade que xestiona a Fundación Hermanos Prieto tivo lugar ás 11:00 horas, e media hora despois desprazouse até a casa consistorial, xa que o Concello do Carballiño tamén fai parte do padroado da Fundación.
Dende a CIG explican que a principal reivindicación pasa pola inmediata readmisión das traballadoras despedidas e o cese das accións de “maltrato verbal e moral”, así como polo cumprimento íntegro das condicións laborais e o respecto ao convenio colectivo.
Finalmente adiantan que nos próximos días anunciarán novas mobilizacións, nesta ocasión diante do Bispado de Ourense, que tamén fai parte do padroado da Fundación Hermanos Prieto.
