![Confederación Intersinidical Galega](/assets/cig/2022/logos/cig.png)
A CIG gaña as eleccións sindicais no Centro Industrial Porriño, de Nueva Pescanova
![](assets/images/b/tapiz_cig_sindicalismo_galego_800_1-efc10a2b.jpg)
A FGAMT-CIG gañou as eleccións sindicais que se veñen de celebrar no Centro Industrial Porriño (antiga Frinova), pertencente ao grupo Nueva Pescanova, ao lograr 4 dos 9 representantes que se escollían no comité de empresa.
![](imaxes/adaptadas/780/files/novas/2019/03/06/Logo_Nueva_Pescanova.jpg)
Tras o proceso electoral celebrado na empresa de alimentación, a representación do cadro de persoal queda formada por 4 delegados/as da CIG, 2 da USO, 2 da UGT e 1 de CCOO. A central sumou un total de 52 votos entre os traballadores/as da fábrica, os mesmos que o resto de forzas sindicais xuntas.
Con este resultado a CIG afianza a súa posición como organización sindical con máis apoios entre o cadro de persoal do Centro Industrial Porriño, integrado por 172 persoas, xa que foi quen de incrementar a súa representación nun delegado/a con respecto ás anteriores eleccións, nas que lograra 3 representantes.
Dende a central agradecen a confianza amosada polos/as empregados/as deste centro de traballo de Nueva Pescanova e sinalan que seguirán a defender os dereitos laborais do conxunto do cadro de persoal.