A CIG gaña as eleccións sindicais en Acuidoro, SL

A central nacionalista obtivo tres dos cinco membros que integrarán o Comité desta piscifactoría de Cervo
A Coruña - 08 Set 2016
A Confederación Intersindical Galega (CIG) vén de obter a maioría nas eleccións sindicais celebradas na piscifactoría Acuidoro, SL. (Cervo), ao lograr 3 dos/as cinco delegados/as que se elixían. Este é o primeiro Comité que se escolle na empresa, logo da fusión das antigas Alrogal e Acuidoro.

O Secretario da Unión Local da CIG da Mariña, Xorxe Caldeiro, explica que para este proceso –que se celebrou o 7 de setembro- estaban convocados os 74  traballadores e traballadoras que conforman o cadro de persoal, dos/as que exerceron o seu dereito de voto  61. Isto representa unha participación de case un 82.5%.

No Colexio de Especialistas (do que formaban parte 59 electores) o escrutinio dos 51 votos emitidos deulle á Confederación Intersindical Galega 33 votos, o 66% dos votos válidos. A outra candidatura que se presentou neste colexio, CCOO, obtivo 17 votos (34%).

No Colexio de Técnicos/as e Administrativos/as (cun censo de 15 traballadores e traballadoras) só se presentou unha candidatura (UGT), que obtivo 8 votos.

Traducidos os votos a representantes, a CIG consigue tres delegados no Comité de empresa, polo que ten a maioría absoluta do mesmo, por un representante de cada un dos outros sindicatos .

“Dende a Confederación Intersindical Galega queremos destacar a gran participación  no proceso e agradecer a confianza depositada polos traballadores e traballadoras no noso sindicato”, asevera Caldeiro.