A CIG denuncia o golpe de Estado contra o pobo catalán, as súas institucións e os seus representantes
A Confederación Intersindical Galega manifesta a súa máis enérxica repulsa ao golpe de Estado perpetrado contra o pobo catalán, as súas institucións e os seus lexítimos representantes. Denuncia a vulneración, por parte do estado español, do principio básico da separación de poderes que rexe todo sistema democrático. Rexeita a persecución de ideas políticas, o encarceramento de persoas por defendelas e o estado de excepción imposto pola vía dos feitos. Por iso chama a participar nas concentracións convocadas para esta tarde en cidades e vilas galegas pola Plataforma Galiza con Catalunya, da que a central sindical fai parte.
Concentracións
As concentracións están todas previstas para as 20:00 horas baixo o lema “Democracia e liberdade”, contra o golpe de estado do 155 e polo dereito de autodeterminación.
- Compostela: Praza do Toural
- A Coruña: Subdelegación do Goberno
- Ferrol: Praza Amada García
- Lugo: Subdelegación do Goberno
- Pontevedra: Praza da Peregrina
- Ourense: Subdelegación do goberno
- Vigo: Farola de Urzáiz
- Vilagarcía: Praza de Galiza
- Redondela: Praza do concello
Desde a CIG reiteramos toda a nosa solidariedade de clase co pobo catalán que unicamente quere expresarse en liberdade e exercer o seu dereito a decidir. Solidarizámonos tamén co soberanismo catalán, que vive ameazado por unha verdadeira cruzada do Estado español contra a liberdade e os dereitos democráticos e non dubida e dar un golpe de Estado pola vía da aplicación do artigo 155, que anula de facto o goberno de Catalunya e reclamamos o recoñecemento do dereito de autodeterminación de todos os pobos.
