![Confederación Intersinidical Galega](/assets/cig/2022/logos/cig.png)
Alertan da preocupante situación dos centros de saúde do Baixo Miño, con listas de agarda de 20 días
![](assets/images/7/CentrodeSaudeAP-febc5d77.jpg)
A federación de Saúde da CIG de Vigo vén de alertar sobre a preocupante situación na que se atopan os centros de saúde da comarca do Baixo Miño como consecuencia da falta de persoal, o que está a provocar que haxa listas de agarda de até 20 días para unha cita ordinaria.
Segundo sinalan dende a central, a lista de espera para unha cita ordinaria no Rosal supera os 20 días, mentres que na Guarda é de como mínimo 10 días. No caso de Oia, a única facultativa que está no centro ten que dar asistencia a dous cupos, urxencias e domicilios, quedando sen médico en caso de saídas programadas ou urxentes durante o tempo que dure esa asistencia, que pode superar as dúas horas.
A falta de persoal médico para substituír as vacacións e días de permisos vén sendo un clásico nos últimos anos, “mais este ano viuse agravada polas medidas excepcionais de vacacións que obrigan a todo o persoal a gozalas antes do mes de outubro”. Esta situación dificulta aínda máis a substitución de persoal sanitario (médico e enfermeiro), o que obrigou ao peche de tarde do centro de saúde da Guarda debido ás numerosas incidencias de problemas de asistencia que houbo en anos anteriores, reforzando as tardes no PAC.
Ao mesmo tempo, indican que a situación de pediatría, agora centralizada no centro de saúde da Guarda, “non é mellor”. Xa que a carga de enfermería viuse incrementada ao asumir a atención do Rosal e Oia sen aumentar o persoal de enfermería deste centro. Isto fai que se afronte con preocupación o mes de agosto ,no que unha enfermeira asumirá os tres cupos máis a atención derivada do turismo, que é importante nesta comarca.
Así mesmo, o persoal administrativo viu multiplicadas as súas funcións, mantendo tamén o mesmo persoal, véndose desbordado e xerándose colas importantes nos mostradores.
Ademais, o PAC vén detectando un aumento de asistencias polas demoras na citación, un problema que se verá agravado coa chegada do turismo. O problema do único equipo “parchease” durante as tardes, pero o maior número de asistencias no verán prodúcense precisamente a partir das 21:00 horas.
Falta de recursos en atención primaria
Diante disto, fan fincapé en que a chamada “nova normalidade” pon en evidencia a escaseza de recursos na atención primaria con centros deteriorados e obsoletos e con problemas para cumprir unhas mínimas condicións de seguridade polos recortes en persoal.
Consideran que tras o período crítico da pandemia o sacrificio segue a ser para os mesmos, a poboación que segue sen ter accesibilidade para a atención e seguimento dos seus procesos de saúde e o persoal que traballa na sanidade pública, que segue sobrecargada.
Neste senso, lembran que a CIG vén denunciando desde hai anos esta situación. “A política do PP de querer facer máis con menos produce unha sobrecarga no persoal; e as políticas de precariedade levaron a centos de sanitarios a emigrar ou buscar alternativas na sanidade privada; isto, xunto coas escasas oposicións que non cubriron durante anos as xubilacións e o aumento da demanda asistencial dunha poboación envellecida, está a producir un deterioro que este ano se vai facer máis evidente”.