![Confederación Intersinidical Galega](/assets/cig/2022/logos/cig.png)
A CIG continúa as mobilizacións en demanda dunhas pensións públicas dignas e garantidas
![](assets/images/8/19-11-28%20ProtestaPensionistasVigo01-5d10cd38.jpeg)
O colectivo de persoas xubiladas e pensionistas da CIG continuou este xoves as mobilizacións en demanda dunhas pensións públicas "que permitan as persoas xubiladas de hoxe e ás que mañá o sexan, poder vivir con dignidade". Pero para garantir este dereito, resultado de décadas de loita obreira, é preciso derrogar de inmediato as reformas que nos anos 2011 e 2013 aprobaron os gobernos do PSOE e do PP, respectivamente.
![](imaxes/adaptadas/780/files/novas/2019/11/28/pensions/19-11-28_ConcentracionPensions_ACorunha_3.jpg)
Unhas reformas que recortaron as contías das pensións, atrasaron a idade da xubilación, aumentaron o período para o seu cálculo, desvincularon o incremento anual do IPC, introduciron o chamado factor de sustentabilidade -que significa que a máis esperanza de vida, menos pensión cobraremos- e practicamente fixeron desaparecer o dereito á xubilación parcial.
Revalorización irrisoria do 0.25%
Malia as promesas do PSOE de Pedro Sánchez, a día de hoxe, as reformas continúan en vigor e, nun contexto de incerteza respecto da conformación do goberno do estado, "atopámonos ante a posibilidade de que, en aplicación da reforma das pensións de 2013, estas se revaloricen cunha irrisoria actualización do 0.25% como xa pasou en anos anteriores", alertan. Por iso "estamos hoxe aquí porque esiximos que as pensións se revaloricen por lei cando menos co IPC"
Dende o colectivo da CIG esixiron a derrogación das reformas de 2011 (contra da que a CIG convocou folga xeral) e a de 2013 "porque estas dúas reformas provocaron a debilidade do sistema público e puxeron nunha situación moi difícil a miles de persoal que son ou serán pensionistas".
![](imaxes/adaptadas/780/files/novas/2019/11/28/pensions/19-11-28%20ProtestaPensionistasPontevedra02.jpeg)
Durante as concentracións lembrouse que as pensións galegas son as segundas máis baixas do Estado, que máis da metade das pensións que cobran galegos e galegas son inferiores a 677€ e 1 de cada 10 menores de 415€/mes.
Fronte ao discurso apocalíptico da inviabilidade das pensións públicas que nos pretenden vender día tras día, o colectivo da CIG reitera a necesidade de aplicar medidas de creación de emprego estábel en condicións dignas e con salarios xustos para dotar de recursos suficientes o sistema, "o de agora e o de mañá". "O sistema público de pensións é unha conquista da clase traballadora a través de décadas de loita. E é a través da loita como temos que evitar que nolas rouben. Por iso seguimos e seguiremos mobilizándonos na rúa".
Táboa reivindicativa da CIG
- Supresión do factor de sustentabilidade. A súa aplicación está aprazada até o ano 2023, mais é necesaria a súa desaparición.
![](imaxes/adaptadas/780/files/novas/2019/11/28/pensions/19-11-28%20ProtestaPensionistasOurense01.jpeg)
- A fixación por lei da pensión mínima igual ao Salario Mínimo Interprofesional (60% do salario medio) e a revalorización anual como mínimo co IPC real.
- Xubilación ordinaria aos 65 anos e voluntaria a partir de ter cotizados 35 anos, reais ou por aplicación dos coeficientes redutores en determinadas profesións.
- Cálculo da base reguladora segundo as bases de cotización, actualizadas á data de reporte da pensión co IPC de todo o tempo transcorrido, dun período de 10 anos elixido pola persoa beneficiaria entre a súa carreira de cotización.
-Supresión das bonificacións e reducións da cotización empresarial á Seguridade Social en determinados tipos de contratos laborais.
- Eliminación dos topes máximos de cotización á Seguridade Social, mantendo uns límites máximos para o importe da pensión.
- Traspaso á Administración galega da competencia de xestión do réxime económico da Seguridade Social prevista no Estatuto de Autonomía.