![Confederación Intersinidical Galega](/assets/cig/2022/logos/cig.png)
A CIG chama a rearmar a loita social na rúa e na negociación colectiva para recuperarmos os dereitos roubados co pretexto da crise
![](assets/images/2/19-01-16_AsembleaDelegadasACorunha_04-74600b22.jpg)
A CIG realizou este mércores asembleas e concentracións de delegadas/os nas diferentes comarcas en defensa do sistema público de pensións e para esixir a derrogación das reformas laborais, da negociación colectiva e das pensións como única vía para garantir a recuperación dos dereitos roubados á clase traballadora baixo a escusa da crise. Dende a CIG lanzouse un chamamento a participar na manifestación que a central ten convocada o sábado 26 de xaneiro, ás 12 horas, en Santiago de Compostela por unhas pensións públicas e garantidas, "porque esta é unha loita que atinxe a toda a clase traballadora".
Ademais desta cuestión, nas asembleas debateuse arredor da folga de mulleres de 24 horas que a CIG convoca para o vindeiro día 8 de marzo e das mobilizacións previstas para o día 10 de marzo, Día da Clase Obreira Galega.
Imaxes das asembleas e concentracións de delegadas/os
Resposta social sostida no tempo
O secretario xeral da CIG, Paulo Carril, que participou na asemblea celebrada na Coruña, puxo o acento na conxuntura política actual "chea de incertezas" e nas actuacións dun Goberno do Estado que non ten vontade de afrontar cambios substanciais nas políticas neoliberais aplicadas até agora, que posibiliten a recuperación dos dereitos roubados baixo escusa da crise. Así, puxo como exemplo os orzamentos xerais que o Executivo de Pedro Sánchez vén de aprobar "que constatan o maltrato histórico con Galiza" ou as últimas medidas adoptadas en materia de pensións públicas.
"Estamos nun momento no que, ou empurramos a mobilización social ou dificilmente poderemos frear a pobreza e a precariedade laboral, os ataques ao sistema público de pensións, o desmantelamento do noso tecido produtivo ou mesmo o auxe da extrema dereita", advertiu Carril.
![](imaxes/adaptadas/780/files/novas/2019/01/16/Asembleas%20de%20delegados-as%20e%20concentracions/2019-01-16%20asemblea%20e%20concentracion%20Compostela%20001.jpg)
De aí que lanzara un chamamento "a rearmar unha resposta social sostida no tempo", tanto na rúa como a través da negociación colectiva, como única alternativa para reverter o empobrecemento da clase traballadora e os procesos de desindustrialización, "que hoxe teñen un claro expoñente na comarca da Coruña, co peche dos fornos de Ferroatlántica, o anuncio de Naturgy de clausurar a central de Meirama ou co lesivo preacordo asinado en Alcoa, que non garante nin o mantemento do 100% do emprego nin a reactivación das cubas de electrólise".
Empregos e salarios dignos para garantir o sistema de pensións
O secretario xeral da CIG lembrou que durante a reunión do pasado decembro coa ministra de Traballo, a central nacionalista urxiu cambios lexislativos para derrogar as reformas laborais de 2010 e 2013, a reforma da negociación colectiva e as reformas das pensións de 2011 e 2013, como paso necesario para xerar emprego estábel, de calidade e con salarios dignos, que permita dotar de recursos suficientes o sistema de pensións.
A este respecto, valorou que o Goberno retomara o IPC como índice para revalorizar as pensións, pero lembrou que aspectos tan lesivos como o factor de sustentabilidade continúan vixentes e que xa se está a falar de ampliar de novo os anos para o cálculo da base reguladora ou volver atrasar a idade efectiva de xubilación.
![](imaxes/adaptadas/780/files/novas/2019/01/16/Asembleas%20de%20delegados-as%20e%20concentracions/19-01-16%20AsembleaMobilizacionXubilacionPensionsPontevedra04.jpeg)
Nesta liña, Carril tamén criticou os cambios aprobados polo Goberno español sobre xubilación parcial aos 61 anos con contrato de relevo, xa que na práctica queda excluída deste dereito a maioría da clase traballadora. "Demandamos a derrogación da reforma das pensións de 2011 e recuperar este dereito nas condicións previas, xa que é un mecanismo de acceso á xubilación en condicións dignas e a unha idade máis que merecida para quen ten longas carreiras de cotización, pero tamén é un mecanismo de creación de postos de traballo para rematar co desemprego e o drama da emigración que sofre Galiza".
A CIG demanda un SMI cando menos igual ao 60% do salario medio
Nas asembleas abordouse tamén a suba do Salario Mínimo Interprofesional, un incremento que Paulo Carril, cualificou como "un tímido avance, mais insuficiente". Así, recordou que a central sindical trasladoulle unha proposta ao director Xeral de Traballo para que neste 2019 o SMI se situara, tal e como recomenda a Carta Social Europea, en cando menos o 60% do salario medio, ante a necesidade urxente de acabar co empobrecemento xeneralizado dos salarios e das rendas de traballo.
![](imaxes/adaptadas/780/files/novas/2019/01/16/Asembleas%20de%20delegados-as%20e%20concentracions/19-01-16_AsembleaDelegadasFerrol_02.jpg)
Con este obxectivo a CIG tamén demandou a derrogación do Indicador Público de Renda de Efectos Múltiples (IPREM) e a utilización do salario mínimo interprofesional como única referencia de indicador público para os efectos de fixar a contía de calquera tipo de prestación social pública.
Neste contexto de deterioro das condicións laborais e sociais e de continuados recortes, criticou que o Goberno galego pretenda aparentar agora unha oposición radical a Madrid, pero que non deixa de ser un simple postureo, "pois nin sequera ten axenda propia para Galiza e mira para outro lado cando se lle trasladan propostas como a da CIG para a creación dunha tarifa industrial estábel, predicíbel e competitiva para as empresas electrointensivas e medidas para que poidamos aproveitar a nosa condición de país xerador e exportador de enerxía para combater a pobreza enerxética e pór a explotación dos nosos recursos ao servizo do desenvolvemento social e económico de Galiza".
O 8 de Marzo a CIG convoca folga de mulleres de 24 horas
A secretaria confederal das Mulleres da CIG, Marga Corral, participou na asemblea de delegados/as de Vigo para abordar a conmemoración do vindeiro 8 de Marzo, Día Internacional da Muller Traballadora. Corral incidiu en primeiro lugar na importancia de enfocar a celebración como unha data de combate, de confrontación e de denuncia do sistema capitalista patriarcal que oprime e discrimina a milleiros de mulleres en todo o mundo.
Lembrou que a CIG ten convocada para esa xornada unha folga de mulleres de 24 horas, “xa que entendemos que a folga é unha ferramenta necesaria para loitar contra os problemas que padecemos: fenda salarial, discriminación laboral, abuso e acoso nos centros de traballo, etc.”.
![](imaxes/adaptadas/780/files/novas/2019/01/16/Asembleas%20de%20delegados-as%20e%20concentracions/19-01-16%20AsembleaMobilizacionXubilacionPensionsVilagarcia01.jpeg)
Diante disto, chamou a todas as mulleres traballadoras a participar nun paro de 24 horas que vai máis alá do estritamente laboral xa que tamén é de consumo, de coidados, etc. e instou os homes a levar estas reivindicacións ás empresas e a apoiar e facilitar que as súas compañeiras non vaian a traballar ese día, ademais de a participar nas mobilizacións que se desenvolverán o 8 de Marzo pola tarde. Pola mañá terán lugar os piquetes e as mobilizacións convocadas pola CIG, que estarán protagonizadas exclusivamente por mulleres. “Polas que estamos, polas que xa non teñen voz, imos á folga”, subliñou Corral.
Ademais, aludiu a outro dos obxectivos desta mobilización, que non é outro que “desmontar a hipocrisía que fai que o sistema bote man do tema das mulleres para lavar a cara”.
Neste punto amosouse moi crítica co que cualificou como “paripé” feito o ano pasado por CCOO e UGT “coa axuda dos medios de comunicación” xa que a pesar de que estes dous sindicatos convocaron folga xeral “cantos homes participaron do paro ou cantas empresas pecharon?”.
![](imaxes/adaptadas/780/files/novas/2019/01/16/Asembleas%20de%20delegados-as%20e%20concentracions/19-01-16_ConcentracionDelegadasLugo_01.jpg)
Corral asegurou que as mulleres organizadas na CIG están fartas desta hipocrisía social que fai que “agora todo o mundo se declare feminista, pero a realidade é que seguimos a ser asasinadas, acosadas, agredidas e discriminadas sen que ningún goberno faga nada por rematar con isto”.
Segundo denunciou, tampouco a Administración de xustiza está a combater esta situación, máis ben ao contrario: “A xustiza española machista e fascista está a reaccionar, como amosan sentenzas como a da Manada”, censurou.
Finalmente, fixo fincapé en que “os nosos dereitos conquístanse loitando na rúa e nos centros de traballo”, polo que salientou a importancia de participar en todas as mobilizacións que convoca o feminismo galego, do que tamén fai parte a CIG.
![](imaxes/adaptadas/780/files/novas/2019/01/16/Asembleas%20de%20delegados-as%20e%20concentracions/19-01-16_ConcentracionDelegadasACorunha_03.jpg)
Solidariedade cos traballadores de Valoriza Auga en folga
Ao remate da asemblea da Coruña, os delegados e as delegadas da CIG sumáronse á concentración que os traballadores de Valoriza estaban realizando diante da sede EMALCSA para trasladarlle así a solidariedade coa folga indefinida que manteñen dende hai case dous meses.
O delegado de persoal, Gilmar Pereira, explicou que, a pesar do tempo transcorrido dende o inicio da folga, "a empresa mantén unha postura inmobilista e pretende ir a un convenio de cinco anos, trasladando incrementos para os anos 2021 e 2022 sobre un IPC que ninguén sabe como vai a resultar. Iso parécenos un abuso". Neste senso, lembrou que os traballadores levan cos salarios conxelados dende o ano 2010, mentres que a empresa obtivo incrementos do prezo/hora que cobra pola prestación do servizo, así como actualizacións correspondentes ao IPC.
Pereira avanzou que onte mesmo a representación do persoal remitiu unha nova proposta a Valoriza Auga, ao Concello da Coruña e a EMALCSA, solicitando unha reunión entre as tres partes (traballadores, concesionaria e Administración local) para tentar avanzar un acordo satisfactorio que permita a sinatura do novo convenio colectivo. A este respecto, o delegado do persoal pide tamén a Valoriza que poña á fronte das negociacións "a unha persoa que de verdade teña capacidade para negociar e decidir".