A CIG chama a participar na manifestación convocada polo sector marisqueiro e o ecoloxista “En defensa do noso mar”
A CIG manifesta o seu apoio á mobilización convocada polos sectores marisqueiro e ecoloxista, baixo o lema “En defensa do noso mar”, o vindeiro domingo día 21 de xaneiro, con saída ás 12:00 horas da Alameda compostelá. A central sindical súmase á denuncia da máis que “nefasta” e “incompetente” xestión da Xunta de Galiza ante o vertido dos pellet.
A CIG fai un chamamento a participar masivamente nesta mobilización para denunciar o desleixo, as mentiras, a manipulación e a incompetencia do goberno de Rueda, que pretendeu minimizar o impacto ecolóxico dos pellet para eludir a súa responsabilidade abocando novamente ao pobo a autoorganizarse para suplir o abandono da administración galega das súas responsabilidades.
A central sindical denuncia ademais a inacción do Estado español, ao que tamén acusa de incompetente, por eludir, ao igual que o PP, as súas responsabilidades e reclama para Galiza as competencias para poder decidir sobre as nosas costas, máis en casos como este.
Xunto a isto, fai súas as reclamacións dos sectores convocantes e exixe tamén un urxente plan de apoio ao sector pesqueiro e un inmediato plan de actuación contra as verteduras.
