![Confederación Intersinidical Galega](/assets/cig/2022/logos/cig.png)
A CIG, CCOO e UGT mobilízanse por un novo convenio provincial do metal de Pontevedra
![](assets/images/3/21-03-01_Protesta_Convenio_Metal_Pontevedra_01-d1bd1cd3.jpeg)
A CIG, CCOO e UGT desenvolveron hoxe a primeira das protestas do calendario de mobilizacións convocado en resposta á decisión da patronal do metal pontevedrés de suspender as negociacións para renovar o convenio colectivo provincial. Delegados/as das tres centrais sindicais levaron a cabo unha concentración en Talleres Fontán en Vigo, mentres que o día 11 trasladaranse a Valga para facer o mesmo diante de Urovesa. E o 24 de marzo teñen previsto celebrar unha asemblea de traballadores/as do sector fronte ao Náutico de Vigo.
![](imaxes/adaptadas/780/files/novas/2021/03/01/Protesta%20metal%20Pontevedra/21-03-01_Protesta_Convenio_Metal_Pontevedra_06.jpeg)
Durante a mobilización de hoxe en Talleres Fontán, empresa situada na Avenida de Castrelos, despregouse unha faixa co lema “Contra a precariedade. Convenio digno xa!” e berráronse consignas criticando a actitude dunha patronal que decidiu romper as conversas tras 14 xuntanzas, “levantándose da mesa e mantendo as súas imposicións e actuando con pasividade e inmobilismo dende o inicio das reunións”. Tamén se interrompeu o tráfico durante uns minutos.
A decisión dos sindicatos chega tras 14 xuntanzas e unha vez que o empresariado rompeu as negociacións “levantándose da mesa e mantendo as súas imposicións e actuando con pasividade e inmobilismo dende o inicio das reunións”.
En consecuencia, e ante a imposibilidade de chegar a acordos “cunha patronal instalada nunhas lóxicas de precarización e empeoramento das condicións de traballo”, as centrais apostaron por saír á rúa para visibilizar a necesidade que teñen os traballadores/as do sector “dunha modernización do convenio, con redución de xornada, subrogación, licenzas, limitación dos centros especiais de emprego, acoso laboral, contratación indefinida, categorías, plans de igualdade, dietas, plus de gardas e unha suba salarial acorde o esforzo que os cadros de persoal fixeron durante todo este tempo de pandemia”.
![](imaxes/adaptadas/780/files/novas/2021/03/01/Protesta%20metal%20Pontevedra/21-03-01_Protesta_Convenio_Metal_Pontevedra_07.jpeg)
Deste xeito, decidiron convocar unha serie de mobilizacións durante o mes de marzo. A seguinte terá lugar o vindeiro xoves día 11 diante de Urovesa en Valga. Ao igual que a celebrada hoxe, a protesta desenvolverase de 11:00 a 12:00 horas.
Mentres que o mércores 24 de marzo celebrarán unha asemblea de traballadores/as do sector fronte o Náutico de Vigo, nas proximidades da estación marítima, para analizar os intentos da patronal de precarizar aínda máis o sector. Dende a CIG, CCOO e UGT fan un chamamento a participar tanto nas protestas como na asemblea como único xeito de lograr unha mellora das condicións laborais.