![Confederación Intersinidical Galega](/assets/cig/2022/logos/cig.png)
A CIG Alu Ibérica traslada o apoio á loita do persoal de Alcoa San Cibrao e urxe unha intervención pública para salvar as plantas de aluminio
![](assets/images/e/19-04-26_ConcentracionAlcoaSanCibrao_011-e46d0d2e.jpg)
A sección sindical de CIG na fábrica de Alu Ibérica da Coruña vén de emitir un comunicado en apio á loita que os traballadores e as traballadoras do complexo de Alcoa San Cibrao están a realizar en defensa dos empregos e da actividade produtiva. A representación da CIG reclama a creación inmediata dunha tarifa industrial estábel, predicíbel e competitiva que teña en conta as particularidades do sector electrointensivo e a intervención pública urxente para salvar as factorías de aluminio da Coruña e da Mariña.
A seguir reproducimos o comunicado íntegro:
A sección sindical de CIG quere manifestar o seu apoio á loita que están a levar o Comité de Alcoa San Cibrao, así como a Coordinadora das empresas auxiliares, contra o peche da planta de aluminio que ten anunciado a transnacional estadounidense. De igual modo solidarízase co máis do milleiro de compañeiros e compañeiras afectadas que entran a traballar na planta a diario, e que de materializarse os plans de Alcoa irían despedidos.
O aluminio é un sector estratéxico para a economía galega, que de modo inexplicábel aínda non está recoñecido como tal en Galiza nin no Estado"
Nin a Mariña, nin A Coruña, nin Galiza pode permitirse o luxo de perder un solo posto de traballo máis no sector industrial, especialmente do sector electrointensivo e da fabricación de aluminio primario. Este é un sector estratéxico para economía galega, que de modo inexplicábel aínda non está recoñecido como tal en Galiza nin no Estado español.
A falta dunha regulación para una tarifa eléctrica industrial que teña en conta as particularidades da industria electrointensiva, que lles permita ter una tarifa estábel, predicíbel e competitiva para poder acometer plans industriais e de inversión a medio e longo prazo pode carrexar a deslocalización deste tipo de produción industrial.
Dende a CIG levamos anos reclamando e mobilizándonos a prol da adopción de medidas que veñan solucionar dunha vez o problema do alto custe da electricidade, propoñendo a creación dunha Tarifa Eléctrica Galega e dunha Tarifa Industrial que recoñeza un estatus especial á industria electrointensiva sen que de momento os distintos gobernos tanto da Xunta, como do Estado fixesen nada.
Máis grave se cadra é o caso galego, que sendo como somos una potencia en xeración enerxética, exportando gran parte da produción a outras zonas do estado, e tendo soportado os enormes custes sociais, ambientais e de explotación dos nosos recursos naturais, négasenos o dereito a aproveitarmos desta riqueza propia e temos que ver como pechan as nosas industrias e centrais eléctricas.
Acreditamos na intervención pública, que é lexítima, legal e posíbel, e que unicamente precisa de vontade política"
Demandámoslle ás distintas Administracións una intervención pública urxente para salvar as factorías de Alu Ibérica na Coruña e de Alcoa na Mariña. Acreditamos nesa intervención, que como xa temos demostrado é lexítima, legal e posíbel, e que unicamente precisa de vontade política.
Polo tanto reiteramos una vez máis o noso apoio aos compañeiros e compañeiras de San Cibrao e animamos a todos os compañeiros/as de Alu Ibérica A Coruña a participar nas mobilizacións que se convoquen para salvar a industria do aluminio e electrointensiva en Galiza. Se actuamos toda a industria xuntos podemos ser máis eficaces e máis escoitados, porque se estamos reclamando día a día unha intervención, temos que saber que se non se produce unha intervención en Alcoa, menos posibilidades haberá de que se produza en Alu Ibérica.
![](imaxes/adaptadas/780/files/novas/2020/06/29/CartazConcentracionAlcoaSantiago.jpg)
Xornada de folga en Alcoa San Cibrao
Os traballadores e as traballadoras da fábrica de San Cibrao continuarán ese mércores, 1 de xull, co calendario de mobilizacións en contra dos despedimentos que pretende aplicar a multinacional e para esixir o mantemento da actividade produtiva. Desta volta, teñen convocada xornada de folga de 24 horas tanto na principal como na industria auxiliar e unha concentración, ás 12:00 horas, diante do edificio administrativo da Xunta en Santiago de Compostela.
Até a capital galega desprazarase o persoal da factoría acompañado de veciños e veciñas da Mariña, pois boa parte do comercio xa anunciou que tamén pechará portas en apoio á xornada de folga e varios concellos informaron informaron que farán o mesmo.