Unha manifestación percorre as rúas do Porriño en solidariedade co persoal de Maderas Iglesias

Centos de persoas reclamaron o pago dos salarios pendentes e medidas para salvar a empresa

O Porriño -

Varios centos de persoas participaron este sábado na manifestación convocada polo comité de Maderas Iglesias (CIG, CCOO e UGT) no Porriño para denunciar os incumprimentos da dirección, entre eles o impago de salarios, e para reclamar medidas que permitan a supervivencia da empresa dedicada á fabricación de tarima flotante.

A marcha arrincou arredor das 11.00 horas da nave principal da compañía, situada en Pontellas, e rematou pasadas as 12:00 horas diante do Concello do Porriño. Durante o traxecto, no que os participantes ocuparon un carril da circulación, berráronse consignas como “Maderas Iglesias solución” ou “Queremos traballar, pero tamén cobrar”.

Ao remate da manifestación tomou a palabra o presidente do comité, Vicente Molares, da CIG, quen agradeceu a solidariedade de todas as persoas que participaron na mobilización e adiantou que no caso de que non se solucione o conflito laboral nas vindeiras semanas poderían convocar folga.

Volver