UGT e USO traizoan o persoal do comercio de alimentación asinando por atrás o convenio colectivo

Este martes, a Confederación de Empresarios/as de Lugo remitía unha comunicación ás centrais CIG e CCOO -convocantes da folga do día 23- anunciando a sinatura do convenio colectivo por parte de UGT e USO, sen que se convocara sequera a comisión negociadora do convenio na que están representados todos os sindicatos.

O que se avanza nesa comunicación a respecto das condicións do acordo non cumpre o mandato da maioría das traballadoras e traballadores do sector, pois a pesar das bondades que queren vender, "a realidade, advirte a CIG, é que non se logran os obxectivos reivindicados polo persoal". Isto é así polos seguintes motivos:

• A suba salarial non é real, posto que hai que contar a existencia de salarios por baixo do SMI, que por tanto non se van incrementar nas porcentaxes anunciadas, xa que o salario está absorbido polo Salario Mínimo.
• Non se acada o complemento ao 100% no caso de IT.
• Non se atende a demanda a respecto dos sábados de calidade.
• Non se establece unha cláusula de revisión salarial que garanta o poder adquisitivo no futuro.

A CIG continúa apostando pola mobilización

A CIG continúa a apostar pola mobilización e a unión dos traballadores e traballadoras "como medio para obter unhas condicións salariais e laborais que recollan as demandas da inmensa maioría do persoal do sector". Cómpre subliñar que a última proposta da patronal -que foi mellorada desde a convocatoria de folga- "non sería tal sen todo o traballo sindical nos centros de traballo, o que demostra o potencial da mobilización".

Este acordo asinado por UGT e USO, "supón unha vendida e unha traizón á gran maioría do persoal do sector", que se manifestou de forma contundente e clara na mobilización histórica do pasado domingo en contra da sinatura do convenio. Traizón ademais realizada con escurantismo e aleivosía, "pois estamos ante un acordo ao que chegarían UGT e USO fóra da mesa de negociación, que é o órgano lexítimo para a negociación do convenio".

A CIG entende que este proceder débese a que a maioría que tecnicamente teñen na mesa "representa hoxe unha minoría no sentir das traballadoras e traballadores". De feito é a propia patronal a que publicamente "vende" o logro de ter chegado a este acordo, "que loxicamente é favorábel para os seus intereses".

Resulta lamentábel a actuación destes dous sindicatos "que conscientemente se converten en colaboradores da patronal para matar o conflito, desaproveitando unha ocasión histórica como é a unidade e o convencemento do persoal de loitar por un convenio digno que, dunha vez por todas, lle dea ao o convenio que merece".

• CIG-Servizos
• comercio de alimentación
• convenio colectivo
• Lugo
• negociación colectiva