Traballadores de Transleche (Grupo Lence) mobilízanse contra a represión e os despedimentos
Traballadores e traballadoras de Transleche (do Grupo Lence) mobilizáronse este luns no polígono do Ceao en rexeitamento á política represiva da empresa e para reclamar a readmisión inmediata dos compañeiros despedidos, un deles delegado de persoal e outro ex representante dos/as traballadores/as.
A empresa, explica Christian López, secretario comarcal da FGAMT-CIG de Lugo-A Mariña, executou estes despedimentos en base a "feitos totalmente incertos dentro no marco dunha incidencia habitual na actividade laboral". Denuncia que estes despedimentos (que xa están recorridos na vía xudicial) forman parte da política de represión e medo iniciada pola empresa, co obxectivo de que os traballadores deixen de reclamar os seus dereitos salariais.
Neste senso, López sinala que a empresa xa manobrara promovendo as eleccións sindicais para dividir a representación do persoal, e como esta estratexia lle saíu mal (a CIG volveu sacar a totalidade dos delegados), Transleche comezou entón a perseguir o persoal.
Atrás destas actuacións antisindicais e represivas, atópase a negativa da empresa a pagar adecuadamente o exceso de xornada. De feito, apunta López, Transleche acumula numerosas denuncias, multas e sancións pola infracotización das horas extraordinarias.
Por iso, advirte que a CIG non vai tolerar este tipo de prácticas represivas e adoptará as medidas sindicais e legais que sexan necesarias para que se respecten os dereitos dos traballadores e se proceda á readmisión inmediata dos compañeiros despedidos.
