Segunda xornada de folga en Masol Iberia Biofuel

Segunda xornada de folga na planta de Masol Iberia Biofuel, logo de que na reunión celebrada onte coa empresa non se produciran avances substanciais que permitan a desconvocatoria das medidas de presión acordadas. Deste xeito, o paros laborais (que se desenvolven de 12 a 16 horas) volverán repetirse os días 26 de febreiro e o 2 de marzo.

Na xuntanza de onte, explica Alberte Amado, da CIG-Industria de Ferrol, fixéronse algunhas concrecións sobre as propostas presentadas pero non se avanzou significativamente nas negociacións para lograr melloras que permitan equiparar as condicións laborais e salariais do persoal de Ferrol coas que xa teñen os traballadores e traballadoras doutras plantas da empresa no Estado español.

A representación social lembra que existen enormes diferenzas salariais entre o persoal da planta de Ferrol e o que opera en Cartagena ou Castellón que poden acadar mesmo os 500 euros, incluso tendo a mesma categoría e atribucións.