O persoal de Urxencias Sanitarias de Galiza 061 e Grupo Norte irá á folga a partir do 1 de agosto
As traballadoras e traballadores da Fundación Pública Urxencias Sanitarias de Galiza 061 e da Central de Coordinación 061 de Urxencias Sanitarias, do Grupo Norte, acordaron o pasado 18 de xullo, en asemblea, convocar unha folga indefinida que se desenvolverá mediante paros parciais, todos os luns, sábados e festivos de 12:00 a 14:00 horas e de 19:00 a 21:00 horas a partir do día 4 de Agosto, no caso da Central de Coordinación. Canto á Fundación 061, a folga desenvolverase, tamén de forma indefinida, mediante paros parciais de 12:00 a 14:00 e de 19:00 a 21:00 os mércores, domingo e festivos dende o día 1 de Agosto de 2018, primeiro día dos paros.
A folga afecta a todo o persoal estatutario que presta os seus servizos nos centros de traballo de Conxo e San Marcos da Fundación Pública Urxencias Sanitarias de Galicia 061 en Compostela e a todo o persoal contratado para o centro de traballo da Central de Coordinación de Urxencias, onde opera o Grupo Norte, no edificio de usos múltiples de San Marcos.
Sen acordo para o traslado
A folga convócase diante da imposibilidade de chegar a un acordo tanto coa Administración como coa empresa nas condicións do cambio de centro de traballo de San Marcos e Conxo á Estrada. Segundo explican, despois de varias reunións co Servizo Galego de Saúde e a Dirección do 061 , chegouse a un punto no que a administración, “nunha posición inmobilista nos puntos importantes”, presentou unha proposta definitiva que dista moito das condicións reclamadas polos/as traballadores/as afectados polo traslado forzoso decretado pola administración.
Aínda que consideran que si se ten avanzado nalgúns puntos, noutros “a administración marca liña vermellas que fan imposible o acordo”.
Alertan ademais de que co plan de traslado facilitado na derradeira reunión pola administración, “non se pode garantir que este se realice coas debidas garantías para un servizo de estas características”.
De feito denuncian que non se sabe, a día de hoxe, en que quenda de traballo do día 2 de outubro se fará o cambio; que non se ten contemplado o número de recursos humanos necesarios o día do traslado, nin se se duplicarán quendas. Xunto a isto aseguran que non existe tampouco un plan de probas previo. Por iso reclaman que o traslado se paralice até dispor dun plan de traslado axeitado e de garantías.
