O naval vigués irá á folga se en 15 días a Xunta non convoca a mesa do sector para abordar as problemáticas laborais
As tres centrais maioritarias no sector naval da Ría de Vigo anunciaron hoxe que convocarán folga se se nun prazo máximo de 15 días a Xunta non reúne a mesa do sector para abordar as crecentes problemáticas laborais que padecen os cadros de persoal dos estaleiros e das empresas auxiliares. Este ultimato chega tras anos alertando da cada vez maior precariedade nunha industria que atravesa un profundo proceso de transformación e que no día de onte rexistrou un novo accidente mortal. En resposta, os traballadores/as paralizaron hoxe a actividade dos estaleiros e percorreron o centro da cidade para concentrarse diante da Inspección de Traballo, onde esixiron a adopción de medidas que garanten a seguridade no traballo.
O sinistro no que perdeu a vida un operario dunha empresa auxiliar que traballa para o estaleiro Armón produciuse cando aínda non se cumpriu un ano da morte doutro operario nas instalacións de Cardama, suceso que elevara o ton das queixas sobre as condicións laborais no sector. Mais a Xunta e a Inspección demostraron unha vez máis a súa falta de compromiso cos dereitos das persoas traballadoras, “desoíndo as denuncias e non convocando a mesa do naval”.
Por iso a CIG, CCOO e UGT optaron hoxe por anunciar unha convocatoria de folga no caso de que non se reúna o sector para abordar as principais problemáticas: precarización, subcontratación, ritmos de traballo elevados, falta de políticas e investimentos en materia de prevención de riscos e xornadas abusivas.
“Nestes últimos anos podemos comprobar como as empresas pretenden impoñer un novo modelo de traballo no sector, que é o que emprega o grupo Armón; un modelo subvencionado pola Administración que se caracteriza pola ausencia de calquera tipo de control en materia de seguridade e que empeora as condicións de traballo coa implantación da xornada partida, obrigando as auxiliares a adaptarse ao seu horario, reducindo drasticamente o seu cadro de persoal e favorecendo a subcontratación, o que incide negativamente na coordinación de actividades, algo esencial na prevención de accidentes”, sinalan dende as centrais.
Unha industria auxiliar forte
En contraposición entenden que o naval, como sector de alto risco, ten que apostar por unha industria auxiliar forte e con estrutura con capacidade de aportar na prevención e na seguridade dos traballadores/as. “Levamos anos solicitando a xuntanza da mesa do naval, organismo fundamental para coordinar e impoñer as directrices que deberan implantarse no sector de forma uniforme e poder abordar os retos que ten o naval vigués de cara ao futuro, como a necesaria xubilación anticipada e os coeficientes redutores que sirvan para rexuvenecer os cadros de persoal e evitar o risco de traballar con determinadas idades nun sector de alto risco”.
Finalmente, esixen das administracións e da Inspección de Traballo que “deixen de fuxir” das súas responsabilidades e que se senten “dunha vez por todas” a abordar o futuro do sector e o modelo empresarial que se está a impoñer.
Estas ideas foron debulladas polo secretario comarcal da CIG-Industria de Vigo, Xulio Fernández, ao remate da mobilización que tivo lugar hoxe para denunciar o falecemento dun operario precisamente no estaleiro Armón. O responsábel sindical foi o encargado de ler o comunicado conxunto elaborado pola CIG, CCOO e UGT para dicir “basta xa” e deixarlle moi claro á Xunta e á Inspección que “non imos permitir nin unha morte máis”.
A práctica totalidade dos traballadores/as do naval paralizaron a actividade do sector e concentráronse diante das instalacións de Armón a partir das 9:00 horas, partindo a continuación en manifestación polo centro da cidade, pasando polo Concello, a Xunta e rematando ás portas da Inspección. Unha vez alí solicitaron unha xuntanza coa autoridade laboral para instala a investigar o acontecido en Armón e a velar polo cumprimento das medidas de seguridade, encontro que terá lugar “ao máis alto nivel” nos vindeiros días, tal e como lles confirmaron dende a Inspección.
