O colectivo de persoas xubiladas e pensionistas da CIG desenvolverá concentracións nas sete cidades galegas o vindeiro 5 de novembro baixo o lema ‘Somos maiores, tamén queremos vivir dignamente’ no marco da campaña que a central sindical está a desenvolver para reclamar dos gobernos español e galego un Plan de Choque urxente con medidas fronte á actual carestía da vida.
LUGARES E HORARIOS DAS MOBILIZACIÓNS
-VIGO: diante do Mercado do Calvario ás 11:30h.
-A CORUÑA: diante do Gadis do Mercado de Elviña ás 11h.
-PONTEVEDRA: na Praza da Peregrina ás 11h.
-FERROL: Edificio Xunta da Galiza, Praza Amada García, ás 11:30h.
-COMPOSTELA: na Praza do Toural ás 11:30 h
-LUGO: diante do Edificio da Xunta, ás 11:30h.
-OURENSE: diante do Edificio da Xunta na Avenida da Habana (Casa de Chocolate) ás 11:30h.
Dende o colectivo denuncian que o medre constante e imparábel dos prezos fai máis difíciles as condicións de vida, levando á ruína o pobo e as clases traballadoras. “As persoas maiores vémonos especialmente afectadas pola suba da electricidade, dos combustíbeis e de moitos produtos de primeira necesidade, ao que hai que engadir os elevados custos da vivenda, unha grave deterioración dos servizos públicos e un retroceso nas políticas sociais”.
O colectivo demanda un Plan de Choque urxente nos próximos Orzamentos da Xunta e do Goberno español que resolva “o que en xustiza merecemos"
Unha suba “descontrolada” dos prezos, agravada pola seca, pero provocada polas guerras imperialistas e a ofensiva belicista que os Estados Unidos teñen en marcha, que conta coa “obediencia” da Unión Europea e co “entreguismo” do Estado español. Unha “perigosa” deriva militarista que está a aumentar “escandalosamente” o gasto militar dos Estados e o “criminal” papel da OTAN.
É por iso polo que chaman a reaccionar e a mobilizarse para facerlle fronte a esta situación e á pretensión dos gobernos de que sexa a clase traballadora a que pague, unha vez máis, esta nova crise, como pasou coas crises anteriores.
Porque entenden que outras políticas públicas son necesarias e posíbeis, como veñen defendendo dende hai tempo, e demandan un Plan de Choque urxente nos próximos Orzamentos da Xunta de Galiza e do Goberno español que resolva “o que en xustiza merecemos”.
PRINCIPAIS PROPOSTAS FRONTE A CARESTÍA DA VIDA
1.- A revaloración das pensións para o 2027 deber ser conforme ao IPC acumulado a final de ano e a recuperación do poder adquisitivo que se perdeu coa introdución no 2021 do índice do IPC medio.
2.- A fixación por lei da pensión mínima igual ao Salario Mínimo Interprofesional. Establecer nos 1.374,74 euros mensuais o SMI con carácter retroactivo desde o 1 de xullo de 2026 para cumprir dunha vez coa Carta Social Europea que recolle que debe ser, como mínimo, igual ao 60% do salario medio.
3.- Creación urxente dun Sistema Público Galego de Servizos de Atención ás Persoas, integrado por unha única rede pública de centros asistenciais e residenciais da terceira idade, centros de día, centros de atención á diversidade, Servizos de Axuda no Fogar e outros servizos. Priorizar a atención a través desta rede de recursos públicos, antes que as axudas económicas. Eliminar os repagamentos na atención e nos coidados e aprobar unha carteira de servizos e prezos públicos.
4.- Frear o proceso de privatización e desmantelamento da sanidade pública galega, reforzar a atención primaria, reducir as listas de agarda e garantir unha atención sanitaria públicas, universal e de calidade, que respecte os dereitos das persoas maiores e do conxunto da poboación.
5.- Aprobación por lei de prezos populares en produtos básicos de alimentación e prezos xustos para quen os produce. Demandamos actuacións contra quen especula nos mercados, contra as empresas enerxéticas e do comercio de alimentación.
6.- Garantir o dereito á vivenda e ao subministro enerxético ás persoas maiores con ingresos iguais ou inferiores ao salario mínimo interprofesional que demandamos.