Mobilizacións en apoio a Palestina o domingo 22 de outubro, ás 12:00 horas, nas cidades e vilas galegas

A CIG fai un chamamento a participar nas mobilizacións convocadas o vindeiro domingo, día 22 de outubro, ás 12:00 horas, en cidades e vilas galegas, en apoio a Palestina. A central sindical manifesta o seu rotundo rexeitamento ao xenocidio e a limpeza étnica que o estado sionista de Israel, con total impunidade, está a cometer contra o pobo palestino coa complicidade da comunidade internacional.

Son centos e miles os palestinos asasinados, os presos e torturados nas cadeas israelís, os mortos como consecuencia do bloqueo, os inspeccionados e humillados a diario, desde hai décadas. É sistemática a violación dos dereitos humanos, constante a ocupación militar dos territorios palestinos e permanente a vulneración das resolucións das Nacións Unidas. Ataques indiscriminados da maquinaria de guerra israelí contra un pobo sometido a un réxime de apartheid, que constitúen crimes contra a humanidade.

A CIG manifesta a súa contundente condena ás atrocidades cometidas contra o pobo palestino. Reclama o urxente cese dos ataques indiscriminados de Israel e, xa que logo, o inmediato alto ao fogo; a urxente apertura de corredores para facilitar a entrada de axuda humanitaria; a fin da ocupación, o remate do apartheid e a inaprazábel reacción das institucións internacionais e dos estados occidentais para que se poña, dunha vez por todas, fin a estes crimes.

• apartheid
• bloqueo