Educación non fomenta o portugués como segunda lingua incumprindo a Lei de aproveitamento deste idioma

A CIG-Ensino vén de denunciar o "desleixo" da Consellaría de Educación no fomento da lingua portuguesa e exixe un cambio de rumbo no pulo ao ensino do portugués, especialmente cando se observa unha caída do alumando que cursa este idioma así como os centros que o imparten.

“Incumprir. Facer ouvidos xordos. Desprezar. Todo isto é o que leva facendo a Consellaría de Educación ao respecto da Lei 1/2014 para o aproveitamento da lingua portuguesa e vínculos coa lusofonía, derivada da Iniciativa Paz Andrade e que hoxe é, claramente, máis papel mollado que nunca”, denuncia a CIG-Ensino.

Asegura que a consellaría “nunca tivo nin o máis mínimo interese” en potenciar a aprendizaxe do portugués como segunda lingua estranxeira entre o alumando galego e entende que por iso “nunca levou adiante ningunha campaña de fomento” que tivese como obxectivo ampliar a oferta e a demanda deste idioma como materia nos institutos do país.

A CIG-Ensino considera que esta aposta redundaría nun incremento da demanda existente nas ensinanzas medias dada a proximidade cultural e lingüística co portugués. “Unha demanda que serviría ao tempo para prestixiar o noso idioma, ao aproveitar as vantaxes lingüísticas que dá a competencia en galego para acadar rapidamente un nivel aceptábel nun idioma que falan actualmente máis de 250 millóns de persoas en todo o mundo”.

Cae o número de centros e alumnado que cursa portugués

No curso 2016/17, e segundo datos proporcionados hai agora un ano polo Secretario Xeral de Política Lingüística da Xunta no Parlamento Galego, había 2.149 alumnos e alumnas en centros galegos cursando portugués, nun total de 65 centros. Unha resposta recente da Consellaría de Educación a un escrito da CIG-Ensino, no que o sindicato se interesaba por coñecer a situación no actual curso, amosa uns datos moi reveladores.

Hai arestora 2.128 alumnos e alumnas cursando portugués desde 1º da ESO a 2º de Bacharelato nun total de 60 centros, 58 públicos e 2 privados. Estes datos oficiais permiten debuxar un mapa da oferta do portugués nos centros docentes absolutamente irregular e no que se evidencia que a oferta do portugués non obedece a ningunha planificación da Xunta de Galiza senón ao bo facer, o interese e o voluntarismo do profesorado que, como vén sendo habitual, toma a iniciativa cando o goberno se instala na desidia e o incumprimento das súas propias leis.

Debullando as cifras oficiais de alumando matriculado pode concluírse que a realidade é aínda máis grave, xa que existen bastantes centros con cifras moi baixas de alumnado matriculado, figurando mesmo 4 centros nos que só hai 1 alumno ou alumna matriculada. Polo tanto, “falamos na práctica de 56 centros cun grupo de alumando”, conclúe.

Por outro lado case o 40% do alumnado matriculado concéntrase en 7 centros, o que é mostra da ausencia absoluta dunha política de apoio ao portugués, como formalmente debería estar comprometido o goberno de Feijóo, polo mero feito de ter aprobado a Lei 1/2014.

Pola contra, “mestres o goberno galego dá as costas ao portugués podemos observar como Estremadura segue potenciando a oferta deste idioma, chegando a superar este ano os 19.000 alumnos e alumnas”.

Unha chamada de atención para reverter a situación

A CIG-Ensino vén demandando desde hai anos que a Consellaría convoque oposicións de portugués en secundaria, recibindo sempre a negativa da Consellaría. O sindicato proporá para a vindeira oferta de emprego público que se oferten, cando menos, prazas para o cambio de especialidade.

Deste xeito, profesorado que agora mesmo imparte esta materia ou outro que estivese disposto a facelo podería acceder a esa nova especialidade e ocupar, nalgúns casos, prazas de portugués nos cadros de persoal dos IES, promovendo deste xeito o avance dos docentes de portugués e favorecendo o incremento da demanda. “Mais é obvio que sen unha campaña decidida por parte da Consellaría de Educación e unha oferta ampla do portugués, comezando polo profesorado que pode impartilo, non se poderán superar uns límites que o propio goberno galego impón”.

RELACIÓN DE CENTROS E NÚMERO DE ALUMNADO QUE CURSAN PORTUGUÉS. FONTE: Consellaría de Educación.

• CIG-Ensino
• portugués